កងទ័ពជើងទឹកថៃយ៉ាងហោចណាស់៣១នាក់ បានបាត់ខ្លួននៅថ្ងៃចន្ទ ទី១៩ នេះ បន្ទាប់ពីបានលិចនាវាក្នុងដែនទឹកសមុទ្រភាគអាគ្នេយ៍នៃប្រទេស។
![](https://cambodiaflashnews.com/wp-content/uploads/2021/06/top-banner.gif)
យោងតាមកាសែតបាងកកប៉ុស្តិ៍របស់ថៃ ហេតុការណ៍លិចនាវានេះ បានកើតឡើងកាលពីពាក់កណ្តាលអធ្រាត្រថ្ងៃអាទិត្យ ទី១៨ ខែធ្នូ ខណៈនាវាល្បាតមានឈ្មោះថា HTMS Sukhothai ស្រាប់តែបានលិចក្នុងពេលកំពុងល្បាតឈូងសមុទ្រថៃចម្ងាយប្រហែល ៣២គីឡូម៉ែត្រពីកំពង់ផែ Bang Saphan នៅភាគខាងកើតឆៀងខាងត្បូងនៃខេត្ត Prachuap Khiri Khan ដោយសារខ្យល់បោកបក់ខ្លាំង។
រូបភាពដែលត្រូវបានចែករំលែកដោយកងទ័ពជើងទឹក បានបង្ហាញឲ្យឃើញពីកប៉ាល់នោះផ្អៀងទៅម្ខាងយ៉ាងពិតប្រាកដ តែមិនបានបង្ហាញពីមនុស្សដែលនៅលើនាវានោះទេ។ ថ្វីបើបេសកកម្មជួយសង្គ្រោះត្រូវបានចាប់ផ្តើមភ្លាមៗក៏ដោយ អ្នកនាំពាក្យកងទ័ពជើងទឹក ឧត្តមនាវីឯក Pogkrong Montradpalin បាននិយាយថា “យើងនៅតែស្វែងរកអ្នកបាត់ខ្លួនចំនួន ៣១ នាក់” ។
លោកបាននិយាយនៅព្រឹកថ្ងៃចន្ទនេះថា “ប្រព័ន្ធប្រតិបត្តិការរបស់កប៉ាល់បានឈប់ដំណើរការ ដែលបណ្តាលឱ្យនាវាបាត់បង់ការគ្រប់គ្រង” ។ បុគ្គលិកសរុបចំនួន ៧៥ នាក់ក្នុងចំណោម ១០៦ នាក់នៅលើនាវាត្រូវស្រង់សង្រ្គោះចេញពីទឹកនៅក្នុងប្រតិបត្តិការជួយសង្គ្រោះចូលរួមពី ឧទ្ធម្ភាគចក្រ សមុទ្រពីរគ្រឿង នាវាចម្បាំងពីរគ្រឿង និងកាណូតមួយ។
សេចក្តីថ្លែងការណ៍បានបន្ថែមថា ប្រតិបត្តិការស្វែងរកនិងជួយសង្គ្រោះដែលបានចាប់ផ្តើមនៅម៉ោង ៧ ព្រឹកកំពុងបន្ត។ ទាហានជើងទឹកប្រមាណ ១១នាក់ កំពុងសម្រាកព្យាបាលនៅមន្ទីរពេទ្យ Bang Saphan ខណៈ ៤០នាក់ផ្សេងទៀតកំពុងសម្រាកព្យាបាលនៅជំរំ៕
ប្រភព៖ Bangkok Posts
ប្រភពរូប៖ Bangkok Posts
ប្រែសម្រួល៖សុខ តុលា