បាត់ដំបង÷ មេខ្លោងកាប់រានដីព្រៃរបស់រដ្ឋចំនួន ២នាក់ ត្រូវបានសមត្ថកិច្ចជំនាញចុះឃាត់ខ្លួនបញ្ជូនទៅកាន់តុលាការអនុវត្តទោស។
លោកវរសេនីយ៍ឯក ប៉ាង ហៀង អធិការនគរបាលស្រុកគាស់ក្រឡ បានប្រាប់ឲ្យដឹងថា÷ អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នង ការដ្ឋាននគរបាលខេត្តបាត់ដំបង នៅថ្ងៃទី១៨ ខែធ្នូ ឆ្នាំ ២០២២នេះ កម្លាំងជំនាញបាននាំខ្លួនមនុស្ស ២នាក់ជាមេខ្លោង បញ្ជូនទៅតុលាការដើម្បីអនុវត្តទោសពីបទកាប់ទន្រ្ទានយកដីរដ្ឋខុសច្បាប់ម្តងហើយម្តងទៀត ប្រព្រឹត្តនៅត្រង់ចំណុចភ្នំស្នរ ភូមិតានួត ឃុំព្រះផុស ស្រុកគា ស់ក្រឡ ខេត្តបាត់ដំបង។
ជនដែលពាក់ព័ន្ធខាងលើឈ្មោះមឿន រឿន ភេទប្រុស អាយុ ៤៥ឆ្នាំ មុខរបរធ្វើស្រែ និងម្នាក់ទៀតឈ្មោះវ៉ិត សាមឿន ភេទប្រុស អាយុ ៣២ ឆ្នាំ មុខរបរធ្វើស្រែ ទាំង ២នាក់មានទីលំនៅក្នុងភូមិតានួត ឃុំព្រះផុស ស្រុកគាស់ក្រឡ។
បច្ចុប្បន្នកម្លាំងនគរបាលការិយាល័យជំនាញបាននាំខ្លួន និងបញ្ជូនសំណុំរឿងនេះទៅកាន់អយ្យការអមសាលាដំបូងខេត្តបាត់ដំបងអនុវត្តតាមនីតិវិធី៕
ដោយ: ព្រះអង្គខ្មៅ
