ក្រុមម្ចាស់ជើងឯកចាស់ គឺក្រុមជម្រើសជាតិបារាំង បានទទូចថា ការលេងនៅចំពោះមុខក្រុមមនុស្ស ដែលគាំទ្រគូបដិបក្ខច្រើនជាង ក្នុងការប្រកួតវគ្គផ្តាច់ព្រ័ត្រ នៅ World Cup នាថ្ងៃអាទិត្យនេះ ជាមួយក្រុមអាហ្សង់ទីន នឹងមិនជះឥទ្ធិពលអ្វីឡើយដល់ពួកគេ ខណៈដែលយក្សរបស់អឺរ៉ុបមួយនេះ កំពុងប្រឹងប្រែង ដើម្បីក្លាយជាក្រុមដំបូងគេ ក្នុងរយៈពេល ៦០ឆ្នាំ ដែលអាចការពារពានរង្វាន់បានសម្រេច។
ក្រុមពពកសអាហ្សង់ទីន អាចនឹងមានការលើកទឹកចិត្តពីអ្នកគាំទ្រអព្យាក្រឹត្យដោយភាគច្រើន ខណៈដែលខ្សែប្រយុទ្ធ Lionel Messi ស្វះស្វែង ដើម្បីបានឈ្នះពានរង្វាន់ នៅ World Cup ជាលើកទី១ ដែលប្រហែលជាហ្គេមចុងក្រោយរបស់គេ ក្នុងការព្រឹត្តិការណ៍ដ៏ធំរបស់ពិភពលោក នៅវ័យ ៣៥ឆ្នាំ។
បន្ថែមពីលើនេះ ក្រុមអាហ្សង់ទីននឹងមានអ្នកគាំទ្រច្រើនជាងមុន សម្រាប់ការប្រកួត នៅឯកីឡដ្ឋាន Lusail ក្នុងទីក្រុងដូហា ដោយរំពឹងថា នឹងមានចំនួនដល់ទៅ ៤០ ០០០នាក់ ខណៈដែលអ្នកគាំទ្ររបស់ក្រុមមាន់គកបារាំងមានចំនួនប្រហែល ៦ ០០០នាក់។
«ខ្ញុំដឹងច្បាស់ថា ក្រុមអាហ្សង់ទីននឹងមានមនុស្សជាច្រើន ដែលនៅចាំគាំទ្រពីក្រោយពួកគេ»។ នេះជាសម្ដីរបស់គ្រូបង្វឹកក្រុមបារាំង លោក Didier Deschamps ដែលសង្ឃឹមថា នឹងក្លាយជាគ្រូបង្វឹកដំបូងគេបង្អស់ ក្នុងការបានឈ្នះពាន World Cup បន្តបន្ទាប់គ្នា គិតចាប់តាំងពីលោក Vittorio Pozzo របស់ក្រុមអ៊ីតាលី ក្នុងទសវត្សរ៍ឆ្នាំ១៩៣០។
លោក Deschamps បានបន្ថែមថា៖ «ខ្ញុំរំពឹងនឹងមានបរិយាកាសដ៏រីករាយ ដោយមានប្រជាជនអាហ្សង់ទីន ដែលពោពេញទៅដោយភាពអន្ទះអន្ទែង ហើយវានឹងជារឿងត្រឹមត្រូវ ដែលអ្នកទាំងនោះ នៅជួយគាំទ្រពីក្រោយក្រុមរបស់ពួកគេ។ ពួកគេស្រែកច្រៀងស្រុះគ្នា និងសម្ដែងចេញបានល្អណាស់។ នោះជារឿងល្អ។ វាជាការប្រកួតវគ្គផ្តាច់ព្រ័ត្រ នៅ World Cup ប៉ុន្តែគូប្រជែងរបស់យើង មិនមែននៅកន្លែងអង្គុយមើលនោះទេ»។
បារាំងអាចក្លាយជាក្រុមទី ១ ចាប់តាំងពីក្រុមប្រេស៊ីល ក្នុងឆ្នាំ១៩៦២ ដែលអាចការពារតំណែងជើងឯក នៅ World Cup បាន ខណៈក្រុមទាំង២ កំពុងសម្លឹងរកការឈ្នះពានរង្វាន់នេះជាលើកទី ៣ ដូចគ្នា ដោយការដណ្ដើមបានជើងឯកលើកចុងក្រោយរបស់ក្រុមអាហ្សង់ទីន កើតឡើងកាលពីឆ្នាំ១៩៨៦។
ក្រុមបារាំងដណ្ដើមបានជ័យជម្នះលើក្រុមអាហ្សង់ទីន ក្នុងដំណើរឆ្ពោះទៅកាន់ការឈ្នះពានរង្វាន់ World Cup 2018 ដោយយកឈ្នះក្នុងលទ្ធផល ៤-៣ នៅពេលដែលពួកគេ ជួបគ្នា ក្នុងវគ្គ ១៦ក្រុមចុងក្រោយ៕
