ក្រុមជម្រើសជាតិក្រូអាស៊ី បានយកឈ្នះក្រុមម៉ារ៉ុក ២-១ ក្នុងការប្រកួតយកចំណាត់ថ្នាក់លេខ ៣ ក្នុងព្រឹត្តិការណ៍ World Cup កាលពីថ្ងៃសៅរ៍ ដោយកីឡាករ Mislav Orsic ជាអ្នករកបាននូវគ្រាប់ជ័យជម្នះ ជាមួយនឹងបច្ចេកទេសស៊ុតបាល់កោងបញ្ចូលទីយ៉ាងស្អាត។
ខ្សែការពារ Josko Gvardiol ដែលជាម្នាក់ ក្នុងចំណោមកីឡាករដ៏លេចធ្លោ ក្នុងការប្រកួតប្រជែងង នៅប្រទេសកាតា បានតែតបញ្ចូលទីឱ្យក្រុមក្រូអាស៊ីនាំមុខមុននៅនាទីទី៧ ប៉ុន្តែខ្សែការពារ Achraf Dari បានជួយឱ្យក្រុមម៉ារ៉ុកតាមស្មើភ្លាមៗ ក្នុងហ្គេម នៅកីឡដ្ឋាន Khalifa International នេះ។
បន្ទាប់មក គ្រាប់បាល់ស៊ុតបញ្ចូលទីដ៏អស្ចារ្យរបស់កីឡាករ Orsic នៅចុងវគ្គទី ១ បានជួយធានាឱ្យក្រូអាស៊ីត្រឡប់ទៅផ្ទះវិញជាមួយនឹងមេដាយសំរឹទ្ធ ដោយនេះជាលើកទី១១ បន្តបន្ទាប់គ្នាហើយ ដែលក្រុមជាប់ចំណាត់ថ្នាក់លេខ ៣ គឺសុទ្ធតែក្រុមទៅពីអឺរ៉ុប។
គ្រូបង្វឹករបស់ក្រុមក្រូអាស៊ី លោក Zlatko Dalic បាននិយាយ នៅក្រោយការប្រកួតខ្លីៗថា៖ «វាជាមេដាយសំរឹទ្ធ ប៉ុន្តែសម្រាប់យើង វាដូចជាមេដាយមាសអ៊ីចឹង!»។
ដោយឡែកលោក Walid Regragui គ្រូបង្វឹករបស់ក្រុមម៉ារ៉ុកវិញ បានលើកឡើងថា មានរឿងជាច្រើន ដើម្បីឱ្យក្រុមរបស់គាត់ឆ្លុះបញ្ចាំងពីមោទនភាព បន្ទាប់ពីពួកគេ បានក្លាយជាក្រុមអាហ្វ្រិកដំបូងគេ ក្នុងការបានឆ្លងមកវគ្គពាក់កណ្តាលផ្តាច់ព្រ័ត្រនេះ ក្នុងប្រវត្តិសាស្ត្ររបស់ World Cup។
ក្រុមម៉ារ៉ុក ដែលមិនធ្លាប់ឆ្លងផុតវគ្គ ១៦ក្រុមចុងក្រោយទាល់តែសោះ នៅមុន World Cup នេះ បានសម្ដែងចេញនូវការប្ដូរផ្ដាច់របស់ពួកគេ ដោយការបង្ហាញនូវទម្រង់លេងប្រកបដោយភាពក្លៀវក្លា ទល់នឹងក្រុមក្រូអាស៊ី ដែលជាជើងឯករងឆ្នាំ២០១៨ ក្នុងការប្រកួតបើកឆាករបស់ពួកគេ នៅប្រទេសកាតា។ តែយ៉ាងក្ដី ការប្រកួតគ្នាម្ដងទៀតនេះ គឺមិនដូចលទ្ធផលស្មើគ្នា ០-០ ក្នុងវគ្គចែកពូលនោះឡើយ៕
