បន្ទាយមានជ័យ៖កម្លាំងអាវុធហត្ថខេត្ត កាលពីថ្ងៃទី១៦ ខែធ្នូ បានបញ្ជូនជនសង្ស័យជាកូនជាងម្នាក់តាមបណ្តឹងករណីលួចដែកជិត ២០០កំណាត់ទៅតុលាការដើម្បីចាត់ការតាមច្បាប់។
មន្ត្រីអាវុធហត្ថក្រុងប៉ោយប៉ែតបានឱ្យដឹងថា កាលពីថ្ងៃទី១៥ ខែធ្នូ កម្លាំងមូលដ្ឋាន បានឃាត់ខ្លួនជាងចាក់លូម្នាក់ពីបទលួចកំណាត់ដែកជិត២០០កំណាត់នៅការដ្ឋានស្ទឹងបត់ ក្នុងសង្កាត់ផ្សារកណ្តាល ក្រុងប៉ោយប៉ែត។ការឃាត់ខ្លួនជនសង្ស័យនោះតាមបណ្តឹងឈ្មោះឌិន ស៊ីថា អាយុ៤៨ឆ្នាំ ជាមេការគ្រប់គ្រងសំណង់ការដ្ឋានខាងលើ។
មន្ត្រីដដែលបានបន្តថា ជនសង្ស័យឈ្មោះ លាន លីម អាយុ២៦ឆ្នាំ បានលួចយកកំណាត់ដែក ថ្នាំងអំពៅទំហំ១៦លី ប្រវែង២ម៉ែត្រ ចំនួន១៨០កំណាត់ជារបស់មេការគ្រប់គ្រងសំណង់នៅការដ្ឋានស្ទឹងបត់នោះ។
មេការដើមបណ្តឹងបានឱ្យដឹងថា មានជាងម្នាក់បានដឹកដែកចេញពីការដ្ឋានដោយមិនមានការអនុញ្ញាត។ភ្លាមនោះរូបគាត់បានទៅមើលក៏ឃើញជនសង្ស័យឈ្មោះលាន លីម បានដឹកកំណាត់ដែកថ្នាំងអំពៅ ចំនួន១៨០កំណាត់ដាក់លើម៉ូតូរ៉ឺម៉កដឹកចេញពីកន្លែងក៏បានប្តឹងអាវុធហត្ថចាប់ខ្លួនតែម្តង។
វត្ថុតាងចាប់បានម៉ូតូសណ្តោងរ៉ឺម៉ក១គ្រឿង ដែកថ្នាំងអំពៅទំហំ១៦លី ប្រវែង២ម៉ែត្រចំនួន១៨០កំណាត់ ហើយសម្ភារទាំងនោះបានប្រគល់ជូនម្ចាស់ដើមវិញ៕ដោយ៖វិចិត្រ
