លោក Fernando Santos បានលាលែងពីតំណែងជាគ្រូបង្វឹករបស់ក្រុមជម្រើសជាតិព័រទុយហ្គាល់ហើយ កាលពីថ្ងៃព្រហស្បតិ៍ បន្ទាប់ពីក្រុមបានធ្លាក់ពីព្រឹត្តិការណ៍ World Cup យ៉ាងគួរឱ្យភ្ញាក់ផ្អើល ក្នុងវគ្គ ១/៤ ផ្តាច់ព្រ័ត្រ ក្រោមស្នាដៃរបស់ក្រុមម៉ារ៉ុក ដោយឈ្មោះរបស់លោក Jose Mourinho កំពុងត្រូវបានចាប់អារម្មណ៍ថា ជាបេក្ខជននាំមុខគេ ក្នុងការបានចូលមកស្នងតំណែងនេះ។
សហព័ន្ធកីឡាបាល់ទាត់ព័រទុយហ្គាល់ (FPF) បានឱ្យដឹង នៅក្នុងសេចក្តីថ្លែងការណ៍មួយថា សហព័ន្ធបានឈានដល់កិច្ចព្រមព្រៀងមួយជាមួយលោក Santos វ័យ ៦៨ឆ្នាំ ដើម្បីបញ្ចប់ដំណើរជោគជ័យ ដ៏អស្ចារ្យ ដែលបានចាប់ផ្តើម ក្នុងខែកញ្ញា ឆ្នាំ២០១៤។
FPF បានបន្ថែមទៀតថា ឥឡូវនេះ សហព័ន្ធនឹងចាប់ផ្តើមដំណើរការ ក្នុងការជ្រើសរើសគ្រូបង្វឹកជម្រើសជាតិបន្ទាប់ ហើយបើយោងតាមការអះអាងរបស់កាសែតកីឡាប្រចាំថ្ងៃ Record លោក Mourinho គឺជាគោលដៅទី ១ របស់សហព័ន្ធ ក្នុងការយកមកធ្វើតួនាទីនេះ នៅមុនការប្រកួតវគ្គជម្រុះនៃព្រឹត្តិការណ៍ Euro 2024។
សហព័ន្ធថែមទាំងត្រូវបានគេរាយការណ៍ថា នឹងស្នើនូវកិច្ចព្រមព្រៀងមួយ ដែលនឹងឃើញថា លោក Mourinho ចូលដឹកនាំក្រុមជម្រើសជាតិជាបណ្តោះអាសន្នសិន ដើម្បីអាចឱ្យរូបគាត់បញ្ចប់រដូវកាលជាមួយក្លិប Roma ក្នុងប្រទេសអ៊ីតាលី។
នៅពេលសួរអំពីការងារ ក្នុងក្រុមជម្រើសជាតិនេះ កាលពីរសៀលថ្ងៃព្រហស្បតិ៍ នៅពេលដែលគាត់បានទៅដល់ភាគខាងត្បូងប្រទេសព័រទុយហ្គាល់ ដើម្បីចូលកន្លែងហ្វឹកហាត់ជាមួយក្រុម Roma លោក Mourinho មិនបានធ្វើអត្ថាធិប្បាយអ្វីនោះទេ។ ការប្រកួត ក្នុងវគ្គជម្រុះសម្រាប់ Euro 2024 ចាប់ផ្តើម ក្នុងខែមីនា។
ជាមួយគ្នានេះ គ្រូបង្វឹកសញ្ជាតិព័រទុយហ្គាល់ លោក Rui Jorge (ដឹកនាំក្រុមអាយុក្រោម ២១ឆ្នាំ), លោក Abel Ferreira (ក្រុម Palmeiras), លោក Paulo Fonseca (ក្រុម Lille), លោក Rui Vitoria (ក្រុមជម្រើសជាតិអេហ្ស៊ីប) និងលោក Jorge Jesus (ក្រុម Fenerbahce) ក៏ស្ថិតក្នុងចំណោមបេក្ខជនដ៏មានសក្តានុពល ដែលត្រូវបានលើកឡើងដោយប្រព័ន្ធផ្សព្វផ្សាយ ក្នុងស្រុកដែរ៕
