កីឡាករ Lionel Messi ស័ក្តិសមនឹងបានលើកពាន ក្នុងព្រឹត្តិការណ៍ World Cup ហើយនឹងដឹកនាំក្រុមអាហ្សង់ទីនទៅរកភាពជោគជ័យ ក្នុងការប្រកួត នៅវគ្គផ្តាច់ព្រ័ត្រ នាថ្ងៃអាទិត្យ។ នេះជាលើកឡើងរបស់លោក Rivaldo ដែលបានឈ្នះពានរង្វាន់ពិភពលោកនេះជាមួយក្រុមជម្រើសជាតិប្រេស៊ីល កាលពីឆ្នាំ២០២២។
កីឡាករ Messi បង្កើតបាននូវទម្រង់លេងដ៏អស្ចារ្យមួយទៀត ខណៈដែលក្រុមជម្រើសជាតិអាហ្សង់ទីន បានយកឈ្នះក្រូអាស៊ី ៣-០ ក្នុងហ្គេម នៅវគ្គពាក់កណ្តាលផ្តាច់ព្រ័ត្រ កាលពីថ្ងៃអង្គារ ដោយជាអ្នកស៊ុតគ្រាប់បាល់បើកឆាក ដោយការទាត់បាល់ប៉េណាល់ទីបានសម្រេច មុនពេលមានចំណែករួម ១គ្រាប់ទៀត ដោយការបញ្ចូនឱ្យកីឡាករ Julian Alvarez បន្ទាប់ពីរត់បណ្ដើរតែម្នាក់ឯងបានយ៉ាងល្អ។
នៅថ្ងៃដែលរូបគេតាមស្មើកំណត់ត្រារបស់លោក Lothar Matthaus ក្នុងការបង្ហាញខ្លួនបាន ២៥លើក នៅ World Cup ខ្សែបយុទ្ធ Messi បានក្លាយជាកីឡាករដំបូងគេ ដែលស៊ុតបញ្ចូលទី និងបញ្ជូនឱ្យមិត្តរួមក្រុម ក្នុងការប្រកួតចំនួន ៤លើកនៃព្រឹត្តិការណ៍នេះ។
គ្រាប់បាល់ទី ១១ ក្នុងការប្រកួត នៅ World Cup របស់កីឡាករ Messi ក៏បានធ្វើឱ្យរូបគេក្លាយជាអ្នកស៊ុតបញ្ចូលទីជាកំណត់ត្រារបស់ក្រុមពពកស នៅក្នុងការប្រកួតប្រជែងនេះផងដែរ ហើយដោយក្រុមប្រេស៊ីល បានធ្លាក់ ក្នុងវគ្គ ១/៤ ផ្តាច់ព្រ័ត្រហើយនោះ លោក Rivaldo សង្ឃឹមថា កីឡាករ Messi អាចដណ្តើមបានពានរង្វាន់ដ៏មានកិត្តយសបំផុតរបស់ពិភពលោកនេះ។
លោក Rivaldo បានសរសេរសារ នៅលើបណ្ដាញសង្គម Instagram ថា៖ «យើងលែងមានក្រុមប្រេស៊ីល ឬកីឡាករ Neymar ក្នុងវគ្គផ្តាច់ព្រ័ត្រនៃការប្រកួតប្រជែងនេះទៀតហើយ ដូច្នេះខ្ញុំនឹងនៅជាមួយអាហ្សង់ទីន។ គ្មានពាក្យពេចន៍អ្វី សម្រាប់អ្នកនោះទេ Leo Messi»។
«អ្នកសមនឹងទទួលបានជើងឯកពិភពលោកនេះពីមុនមករួចហើយ ប៉ុន្តែព្រះជាម្ចាស់ទ្រង់ជ្រាបគ្រប់យ៉ាង ហើយទ្រង់នឹងប្រគល់ជើងឯកឱ្យអ្នក នៅថ្ងៃអាទិត្យនេះ។ អ្នកសមនឹងទទួលបានពានរង្វាន់នេះ សម្រាប់មនុស្សដ៏អស្ចារ្យដូចអ្នក និងសម្រាប់បាល់ទាត់ដ៏អស្ចារ្យ ដែលអ្នកតែងតែលេង។ សូមកោតសរសើរ និងអរគុណ ចំពោះអ្នក។ សូមព្រះប្រទានពរដល់អ្នក»។ នេះជាការសរសេររៀបរាប់បន្ថែមរបស់លោក Rivaldo៕
