ភ្នំពេញ៖រថយន្តស្ទូចបានបើកយ៉ាងលឿន ដល់ផ្លូវបំបែកបួងចង្កូតជ្រុលបុកផ្ទះលក់គ្រឿងសមុទ្រនិងគ្រឿងក្រអូប បណ្តាលឱ្យខូចខាតយ៉ាងដំណំ និងបុរសម្នាក់រងរបួសធ្ងន់។ គ្រោះថ្នាក់ចរចរនេះបានកើតឡើងនៅភូមិត្រពាំងក្រសាំង សង្កាត់បឹងធំ ខណ្ឌកំបូល កាលពីរសៀលថ្ងៃទី១៥ ខែធ្នូ។
អ្នកភូមិបានឱ្យដឹងថា មុនកើតហេតុ គេឃើញរថយន្តស្ទូចផ្លាកលេខភ្នំពេញ3C-1526 បើកតាមផ្លូវបេតុងពីជើងទៅត្បូងក្នុងល្បឿនលឿន។មកដល់ផ្លូវបំបែកជាបួនបួងចង្កូតទៅម្ខាងផ្លូវ ក៏ជ្រុលទៅបុកផ្ទះលក់គ្រឿងសមុទ្រនិងផ្ទះលក់គ្រឿងក្រអូបបង្កឱ្យខូចខាតយ៉ាងដំណំ ព្រមទាំងបណ្ដាលឲ្យបុរសម្នាក់កំពុងអង្គុយលក់គ្រឿងសមុទ្ររងរបួសធ្ងន់។
ក្រោយកើតហេតុ ប្រជាពលរដ្ឋបានឃាត់តៃកុងរថយន្តប្រគល់ឱ្យសមត្ថកិច្ចមូលដ្ឋានបញ្ជូនទៅនគរបាលចរាចរណ៍រាជធានីភ្នំពេញដើម្បីដោះស្រាយតាមនីតិវិធី៕ដោយ៖វិចិត្រ
