ភ្នំពេញ៖រថយន្តម៉ាកឡង់គ្រីស័រពណ៌ខ្មៅ ផ្លាកលេខរដ្ឋបានបើកឆ្លងផ្លូវ ម៉ូតូមកបុកពីចំហៀងពេញទំហឹងបណ្តាលឱ្យមនុស្សប្រុសស្រី២នាក់រងរបួសធ្ងន់ត្រូវដឹកទៅមន្ទីរពេទ្យសង្គ្រោះបន្ទាន់។គ្រោះថ្នាក់ចរាចរនេះបានកើតឡើងនៅច្រកចូលមន្ទីរពេទ្យពោធិ៍ចិនតុង តាមមហាវិថីសហព័ន្ធរុស្ស៊ី ក្នុងសង្កាត់កាកាបទី១ ខណ្ឌពោធិ៍សែនជ័យ កាលពីម៉ោង១០ព្រឹក ថ្ងៃទី១៦ ខែធ្នូ។
អ្នកឃើញហេតុការណ៍បានឱ្យដឹងថា ដំបូងរថយន្តម៉ាកឡង់គ្រីស័រ ផ្លាករដ្ឋ16-02-0454 បើក តាមផ្លូវសហព័ន្ធរុស្ស៊ីពីលិចទៅកើត។មកដល់កន្លែងខាងលើក៏បត់ឆ្លងផ្លូវចូលច្រកមន្ទីរពេទ្យ ពោធិ៍ចិនតុង ស្រាប់តែមានម៉ូតូហុងដាឌ្រីមផ្លាកលេខសៀមរាប1S 4712 ជិះឌុបគ្នាក្នុងល្បឿនលឿនបុកពីចំហៀងរថយន្តពេញទំហឹង បណ្តាលឱ្យរងរបួសធ្ងន់ទាំង២នាក់។
ជនរងគ្រោះត្រូវបានរថយន្តដឹកទៅមន្ទីរពេទ្យភ្លាមៗ។ចំណែកម៉ូតូនិងរថយន្តត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ រង់ចាំដោះស្រាយពេលក្រោយ៕ដោយ៖វិចិត្រ
