មនុស្សយ៉ាងហោចណាស់១៦នាក់បានស្លាប់ និង១៧នាក់បាត់ខ្លួន ដោយសារគ្រោះរអិលបាក់ដីតំបន់ភ្នំភាគឦសានរដ្ឋធានីកូឡាឡាំពួរ ប្រទេសម៉ាឡេស៊ី។
![](https://cambodiaflashnews.com/wp-content/uploads/2021/06/top-banner.gif)
យោងតាមទីភ្នាក់ងារគ្រប់គ្រងគ្រោះមហន្តរាយជាតិ (NADMA) បានឲ្យដឹងថា គ្រោះថ្នាក់ធម្មជាតិនេះ បានកើតឡើងកាលពីព្រឹកព្រលឹមថ្ងៃសុក្រទី ១៦ ខែធ្នូ ឆ្នាំ២០២២ ក្នុងបរិវេណតំបន់បោះជំរំតំបន់ភ្នំរដ្ឋរដ្ឋ Selangor ភាគឦសាននៃទីក្រុងកូឡាឡាំពួរ ខណៈក្រសួងរដ្ឋាភិបាល និងអភិវឌ្ឍន៍មូលដ្ឋានបាននិយាយថា គិតត្រឹមម៉ោង ១ រសៀលថ្ងៃដដែល ចំនួនអ្នកស្លាប់បានកើនឡើងដល់ ១៦ នាក់ហើយ រីឯ ១៧ នាក់ទៀតកំពុងបាត់ខ្លួនរកមិនឃើញ។
នៅក្នុងការបាក់ដី មនុស្សរងគ្រោះជាច្រើនត្រូវបានទាញចេញពីភក់ និងកម្ទេចកម្ទី ខណៈមនុស្សសរុបនៅកន្លែងកើតហេតុមានចំនួន៩២នាក់។ ឆ្លើយតបជាមួយគ្នា នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បាននិយាយថា គាត់មានការភ្ញាក់ផ្អើលជាខ្លាំងចំពោះព័ត៌មាននៃការបាក់ដីនេះ។ លោកនឹងទៅមើលកន្លែងកើតហេតុដោយផ្ទាល់នៅថ្ងៃសុក្រ។ លោកបាននិយាយក្នុងសេចក្តីថ្លែងការណ៍មួយថា៖ “សូមបួងសួងដល់ប្រជាជនម៉ាឡេស៊ី ហើយសង្ឃឹមថាបេសកកម្មនេះប្រព្រឹត្តទៅដោយរលូន”៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា