ទីប្រឹក្សាប្រធានាធិបតីអ៊ុយក្រែនហ្សេឡិនស្គី និយាយថា លោកពូទីនគួរតែទទួលស្គាល់ការពិតទៅ ទឹកដីអ៊ុយក្រែនមិនមែនជាផ្នែកនៃរុស្ស៊ីនោះទេ បានត្រឹមតែបាត់បង់កេរ្តិ៍ឈ្មោះប៉ុណ្ណោះ។
![](https://cambodiaflashnews.com/wp-content/uploads/2021/06/top-banner.gif)
លោក Mikhail Podolyak ជាទីប្រឹក្សាប្រធានាធិបតីអ៊ុយក្រែន បានសរសេរបង្ហោះសារជាសាធារណៈនៅលើបណ្តាញសង្គមធ្វីតធ័រយ៉ាងដូច្នេះថា “វាចាំបាច់សម្រាប់ប្រទេស រុស្ស៊ី (ជាពិសេសសម្រាប់ពូទីន និង Peskov) ដើម្បីទទួលយកការពិតថ្មី” ។ “មិនមានទឹកដីអ៊ុយក្រែនណាដែលត្រូវបានលួចដាក់ចូលក្នុងសហព័ន្ធរុស្ស៊ីជារៀងរហូតនោះទេ។ មានតែការបាត់បង់កេរ្តិ៍ឈ្មោះ ក្លាយជាប្រទេសបិសាច ការដួលរលំយោធារុស្ស៊ី ការបំផ្លាញកងទ័ព ការដាក់ទណ្ឌកម្ម និងការមើលងាយសូម្បីតែពី CSTO ប៉ុណ្ណោះ”។ CSTO គឺចង់សំដៅទៅលើអង្គការសន្ធិសញ្ញាសន្តិសុខសមូហភាព ដែលជាសម្ព័ន្ធមិត្តយោធាដឹកនាំដោយរុស្ស៊ីរបស់អតីតសាធារណរដ្ឋសូវៀត។
មិនមានការឆ្លើយតបពីរុស្ស៊ីទេ តែសារបានកើតឡើងក្រោយវិមានក្រឹមឡាំងបាននិយាយកាលពីថ្ងៃអង្គារថាអ៊ុយក្រែនត្រូវតែទទួលយក “ការពិត” ថ្មីទាក់ទងនឹងការបញ្ចូលខុសច្បាប់របស់ទីក្រុងមូស្គូនៃតំបន់អ៊ុយក្រែនចំនួនបួន ប្រសិនបើខ្លួនចង់ពិភាក្សាកិច្ចព្រមព្រៀងសន្តិភាព។ ចំពោះតំបន់បួនដែលបានដាក់បញ្ចូល ត្រូវបានរុស្ស៊ីធ្វើប្រជាមតិនាពេលកន្លងទៅរួមមានខេត្តពីរនៃឧបទ្វីបដុនបាស គឺ លូហាន់ និងដូណេត ដែនដីឧស្សាហកម្មនុយក្លេអ៊ែរ Zaporizha និងតំបន់កំពង់ផែឃើសនភាគខាងត្បូង។ តែតំបន់ឃើសនត្រូវបានអ៊ុយក្រែនរំដោះយកបានមកវិញហើយ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា