កីឡាករ Lionel Messi ដែលពេញដោយក្ដីរីករាយ បាននិយាយសាទរ ចំពោះចរិតដ៏រឹងមាំរបស់ក្រុមខ្លួន បន្ទាប់ពីរូបគេបានធ្វើតួនាទីយ៉ាងប្រសើរ ក្នុងជ័យជម្នះ ៣-០ លើក្រុមក្រូអាស៊ី សម្រាប់ការប្រកួតនៅវគ្គពាក់កណ្តាលផ្តាច់ព្រ័ត្រ ក្នុងព្រឹត្តិការណ៍ World Cup 2022 កាលពីថ្ងៃអង្គារ ។
![](https://cambodiaflashnews.com/wp-content/uploads/2021/06/top-banner.gif)
កីឡាករ Messi ជាអ្នកស៊ុតគ្រាប់បាល់បើកឆាក ដោយការទាត់បាល់ពិន័យ ១១ម៉ែត្របានសម្រេច ហើយបន្ទាប់មកខ្សែប្រយុទ្ធ Julian Alvarez បន្ថែម ២គ្រាប់ទៀត សម្រាប់ការប្រកួត នៅកីឡដ្ឋាន Lusail នេះ ខណៈដែលក្រុមពពកអាហ្សង់ទីន បានឆ្លងផុតក្រុមក្រូអាស៊ី ហើយឡើងទៅវគ្គផ្តាច់ព្រ័ត្រ ដែលពួកគេនឹងជួបជាមួយក្រុមបារាំង ឬក៏ម៉ារ៉ុក នៅថ្ងៃអាទិត្យ។
ជ័យជម្នះនេះ បានបន្តដំណើរនៃការផ្លាស់ប្តូរដ៏គួរឱ្យកត់សម្គាល់ពីក្រុមរបស់លោក Lionel Scaloni បន្ទាប់ពីពួកគេបានចាប់ផ្តើមយុទ្ធនាការរបស់ខ្លូន ក្នុងប្រទេសកាតា ជាមួយនឹងការរងបរាជ័យដ៏គួរឱ្យភ្ញាក់ផ្អើល ក្នុងលទ្ធផល ២-១ ក្រោមស្នាដៃរបស់ក្រុមអារ៉ាប៊ីសាអ៊ូឌីត។
«ខ្ញុំគិតថា លទ្ធផលនៃការប្រកួតដំបូងបង្អស់ គឺជាការខកចិត្តដ៏តានតឹងខ្លាំងណាស់ សម្រាប់ពួកយើង ព្រោះពួកយើងបានលេង ៣៦ហ្គេម ដែលមិនចាញ់សោះ»។ នេះជាសម្ដីរបស់កីឡាករ Messi ដែលបាននិយាយទៅកាន់អ្នកសារព័ត៌មាន បន្ទាប់ពីបានជាប់ឈ្មោះជាកីឡាករល្អជាងគេនៃការប្រកួត កាលពីយប់មិញនេះ។
រូបគេបានបន្តថា៖ «ក្នុងចាប់ផ្តើមលើផ្លូវនោះ នៅពេលដែលគ្មាននរណាម្នាក់រំពឹងថា យើងនឹងចាញ់ការប្រកួត គឺជាការធ្វើតេស្តដ៏ពិតប្រាកដមួយ សម្រាប់កីឡាករ ក្នុងក្រុមនេះ។ ប៉ុន្តែយើងបានបង្ហាញថា យើងខ្លាំងកម្រិតប៉ុនណា។ អ្វីដែលយើងបានធ្វើ តាំងពីពេលនោះមក គឺពិតជាលំបាកណាស់ ព្រោះរាល់ការប្រកួតទាំងអស់ គឺជាវគ្គផ្តាច់ព្រ័ត្រ។ យើងបានលេងវគ្គផ្ដាច់ព្រ័ត្រ ៥លើក ឈ្នះទាំងអស់ ហើយសង្ឃឹមថា យើងឈ្នះហ្គេមបន្ទាប់»។
កីឡាករ Messi បានបន្ថែមថា៖ «ក្រុមនេះមានចរិតរឹងមាំណាស់ ហើយក៏មានភាពវៃឆ្លាតផងដែរ។ យើងមានក្រុម ដែលមានសមត្ថភាព យល់ពីហ្គេមបាន ដែលដឹងពីរបៀបអត់ធ្មត់ នៅពេលពួកគេទទួលរងការខកចិត្ត។ យើងមានបុគ្គលិកគ្រូបង្ហាត់ដ៏អស្ចារ្យ ដែលមិនបណ្ដោយឱ្យឱកាសបាត់បង់។ ទាំងអស់នោះ បានជួយច្រើនណាស់ ព្រោះវាមានន័យថា យើងតែងតែដឹងពីអ្វីដែលយើងត្រូវធ្វើ»។
ប្រធានក្រុមអាហ្សង់ទីនរូបនេះ ឥឡូវនេះ គឺជាអ្នកស៊ុតបញ្ចូលទីច្រើនជាងគេរួម ក្នុងការប្រកួតប្រជែងនេះ ជាមួយនឹងគ្រាប់បាល់ចំនួន ៥គ្រាប់ ខណៈដែលរូបគេសម្លឹងដល់ការឈ្នះពានរង្វាន់ នៅ World Cup ជាលើកដំបូង ក្នុងអាជីពដ៏ត្រចះត្រចង់របស់ខ្លួណ នៅវ័យ ៣៥ឆ្នាំ។
គ្រាប់បាល់បើកឆាករបស់គេ ទល់នឹងក្រូអាស៊ីនេះ គឺជាគ្រាប់បាល់ទី ១១ នៅ World Cup ដែលចំនួននេះនាំឱ្យរូបគេតាមស្មើកំណត់ត្រា ក្នុងក្រុមអាហ្សង់ទីន ដែលគ្រប់គ្រងដោយអតីតកីឡាករ លោក Gabriel Batistuta៕