កំពង់ស្ពឺ៖ រថយន្ដធំដឹកថ្មម៉ាកនីសាន់ផ្លាកលេខ ខេមរភូមិន្ទក្នុងដំណើរបញ្ច្រាសគ្នា បានបុករួចកិនម៉ូតូ២គ្រឿងឱ្យខូចខ្ទេចទាំងស្រុងនិងមនុស្សរងរបួសធ្ងន់៣នាក់។គ្រោះថ្នាក់ចរាចររនេះបានកើតឡើងនៅលើផ្លូវជាតិលេខ៤១ ចន្លោះគីឡូម៉ែត្រលេខ៥-៦ ម្តុំភូមិកំណប់ ឃុំរលាំងគ្រើល ស្រុកសំរោងទង នៅព្រឹកថ្ងៃទី១៤ ខែធ្នូ។
![](https://cambodiaflashnews.com/wp-content/uploads/2021/06/top-banner.gif)
សមត្ថកិច្ចបានឱ្យដឹងថា មុនកើតហេតុ រថយន្ដធំដឹកថ្មម៉ាកនីសាន់ ផ្លាកលេខ ខេមរភូមិន្ទ 01-3-4980 បើកពីជើងទៅត្បូង។មកដល់កន្លែងខាងលើបានរេចង្កូតទៅឆ្វេងដៃហើយបុកម៉ូតូ២គ្រឿងមកពីមុខរួចកិនពីលើបណ្តាលឱ្យខូចខ្ទេចខ្ទីនិងមនុស្សរងរបួសធ្ងន់៣នាក់។ភ្លាមនោះអ្នកបើកបររថយន្តបង្កបានចុះរត់គេចខ្លួនបាត់។
ម៉ូតូរងគ្រោះម៉ាកហុងដាឌ្រីមផ្លាកលេខកំពង់ឆ្នាំង1R-4160 ម្ចាស់ឈ្មោះនួន សុខ លៀង អាយុ៣៥ឆ្នាំ អ្នករួមដំណើរឈ្មោះផៃ ស្រីលក្ខ ភេទស្រី អាយុ២៦ឆ្នាំ ទាំង២នាក់នៅភូមិអង្គមេត្រី ស្រុកសំរោងទង។ម៉ូតូទី២ម៉ាកវ៉េវអាល់ហ្វា ផ្លាកលេខភ្នំពេញ1K-7226 បើកបរដោយឈ្មោះពេញ ដូច អាយុ៣៤ឆ្នាំ នៅភូមិក្រាំងរលួស ស្រុកកណ្តាលស្ទឹង ខេត្តកណ្តាល ។
សមត្ថកិច្ចបានយកមធ្យោបាយបង្កនិងរងគ្រោះទៅរក្សាទុកនៅប៉ុស្តិ៍នគរបាលរដ្ឋបាលរលាំងគ្រើលនិងបន្ដស្រាវជ្រាវរកតៃកុងរថយន្តបង្កមកទទួលខុសត្រូវក្នុងករណីនេះ៕ដោយ៖វិចិត្រ