លោក Luis de la Fuente បានលើកឡើងប្រកបដោយទំនុកចិត្តថា គ្មានគ្រូបង្វឹករូបណា ដែលល្អជាងនេះ ក្នុងការមកដឹកនាំក្រុមជម្រើសជាតិអេស្ប៉ាញនោះទេ បន្ទាប់ពីបាននិយាយជាលើកដំបូង តាំងពីត្រូវបានប្រកាសថា ជាអ្នកស្នងតំណែងរបស់លោក Luis Enrique។
![](https://cambodiaflashnews.com/wp-content/uploads/2021/06/top-banner.gif)
ក្រុមគោជល់អេស្ប៉ាញ បានចែកផ្លូវជាមួយគ្រូបង្វឹកមុនលោក Enrique បន្ទាប់ពីបានធ្លាក់ចេញពីព្រឹត្តិការណ៍ World Cup ដ៏គួរឱ្យភ្ញាក់ផ្អើល ដោយសារក្រុមម៉ារ៉ុក ក្នុងវគ្គ ១៦ក្រុមចុងក្រោយ ដោយបានកើតឡើងក្នុងយុទ្ធនាការដ៏សែនលំបាក នៅប្រទេសកាតា ឆ្នាំ២០២២។
លោក De la Fuente ដែលបានធ្វើជាគ្រូបង្វឹករបស់ក្រុមជម្រើសជាតិអេស្ប៉ាញអាយុក្រោម ១៩ឆ្នាំ អាយុក្រោម ២១ឆ្នាំ និងអាយុក្រោម ២៣ឆ្នាំ ក្នុងរយៈពេល ១ទសវត្សរ៍កន្លងមកនោះ ត្រូវបានអះអាងថា ជាអ្នកមកធ្វើតួនាទីជំនួស ដោយគ្រូបង្វឹកវ័យ ៦១ឆ្នាំរូបនេះ ត្រៀមចូលរួមប្រកួត ក្នុងវគ្គជម្រុះ សម្រាប់ព្រឹត្តិការណ៍ Euro 2024 នាឆ្នាំក្រោយ។
និយាយនៅឯពិធីបង្ហាញខ្លួនផ្លូវការរបស់គាត់ អតីតខ្សែការពាររបស់ក្រុម Athletic Bilbao បានបង្ហាញពីគុណសម្បត្តិរបស់គាត់ថា តើមូលហេតុអ្វីដែលគាត់ជាបុគ្គលដ៏ស័ក្ដិសម ក្នុងការមកទទួលតួនាទីនេះ ហើយបានប្តេជ្ញាថានឹងបត់បែន តាមវិធីដែលចូលឱ្យដល់ក្រុមជម្រើសជាតិ។
គាត់បានថ្លែងថា៖ «ខ្ញុំជាកីឡាករបាល់ទាត់អាជីពអស់រយៈពេល ១៥ឆ្នាំ។ ខ្ញុំបានឈ្នះពានរង្វាន់នានា។ ខ្ញុំបានធ្វើជាគ្រូបង្វឹកកម្រិតអន្តរជាតិគ្រប់ប្រភេទអាយុ លើកលែងតែក្រុមធំ។ ជាមួយនឹងភាពចេះដាក់ខ្លួន និងភាពស្មោះត្រង់របស់ខ្ញុំ ប្រសិនបើមាននរណាម្នាក់ ដែលដឹងពីអនាគតនៃបាល់ទាត់អេស្ប៉ាញ នោះគឺរូបខ្ញុំ។ ខ្ញុំនឹងព្យាយាមផ្តល់នូវភាពខុសប្លែក ដើម្បីធ្វើឱ្យវាកាន់តែប្រសើរឡើង»៕