គ្រូបង្វឹករបស់ក្រុមជម្រើសជាតិអាហ្សង់ទីន លោក Lionel Scaloni កាលពីថ្ងៃចន្ទ បានច្រានចោលការចោទប្រកាន់លើការខ្វះភាពជាអ្នកកីឡារបស់កូនក្រុម ខណៈដែលក្រុមរបស់តំបន់អាមេរិកឡាទីន (អាមេរិកខាងត្បូង) មួយនេះ បានរៀបចំត្រៀមខ្លួន សម្រាប់ការប្រកួត ក្នុងវគ្គពាក់កណ្តាលផ្តាច់ព្រ័ត្រ ទល់នឹងក្រុមក្រូអាស៊ី ក្នុងព្រឹត្តិការណ៍ World Cup។
![](https://cambodiaflashnews.com/wp-content/uploads/2021/06/top-banner.gif)
បន្ទាប់ពីសកម្មភាពដ៏មមាញឹករយៈពេល ៣សប្តាហ៍ ក្នុងប្រទេសកាតា នៅសល់តែ ៤ក្រុមប៉ុណ្ណោះ ដែលកំពុងឈរជើង ខណៈដែលការប្រកួតប្រជែងធ្វើដំណើរតម្រង់ឆ្ពោះទៅកាន់វគ្គផ្ដាច់ព្រ័ត្រ។ ក្រុមអាហ្សង់ទីនរបស់កីឡាករ Lionel Messi ត្រូវប៉ះជាមួយក្រុមក្រូអាស៊ី ក្នុងវគ្គ ៤ក្រុមចុងក្រោយដំបូងគេ នៅថ្ងៃអង្គារ មុនពេលថ្ងៃបន្ទាប់ក្រុមម្ចាស់ជើងឯកឆ្នាំ២០១៨ បារាំងត្រូវប្រឈមជាមួយក្រុមម៉ារ៉ុក ដែលត្រូវបានគេស្គាល់ថា ជាអ្នកពិឃាតក្រុមយក្ស។
ក្នុងកីឡដ្ឋាន Lusail កីឡាករ Messi នៅលើទីលាន នឹងព្យាយាមនាំក្រុមអាហ្សង់ទីន ដើម្បីបានឡើងទៅវគ្គផ្តាច់ព្រ័ត្រ នៅ World Cup ជាលើកទី ២ ក្នុងរយៈពេល ៨ឆ្នាំ។ កីឡាករ Messi ដែលសម្លឹងរកការឈ្នះពានរង្វាន់ ក្នុងអាជីពរបស់ខ្លួនជាមួយនឹងជ័យជម្នះលើវេទិកាដ៏ធំបំផុតរបស់កីឡាបាល់ទាត់នេះ គឺជាតួអង្គសំខាន់ម្នាក់ ក្នុងជ័យជម្នះ នៅវគ្គ ១/៤ ផ្តាច់ព្រ័ត្រលើក្រុមហូឡង់ កាលពីថ្ងៃសុក្រ ខណៈដែលកំហឹងបានផ្ទុះឡើង រវាងក្រុមទាំងសងខាង ក្នុងហ្គេមនោះ ហើយមានការផ្ដល់កាតលឿងដល់ទៅ ១៨សន្លឹក។
ការប្រកួត ដែលនាំឱ្យកើតមានការមិនសប្បាយចិត្ត បានបញ្ចប់ដោយកីឡាកររបស់ក្រុមអាហ្សង់ទីន បង្ហាញកាយវិការចំអកឱ្យកីឡាករគូបដិបក្ខហូឡង់ ដែលកំពុងខកចិត្ត មុនពេលពួកគេរត់ចេញទៅធ្វើការអបអរ បន្ទាប់ពីឈ្នះការទាត់បាល់ប៉េណាល់ទីកាត់ក្ដី។ សូម្បីតែកីឡាករ Messi ដែលដោយធម្មតា មានចរិតស្លូតបូត ក៏ត្រូវបានឃើញជាប់ក្នុងទង្វើនេះដែរ ដោយហាក់ដូចជាស្រែកជេរប្រមាថលើកីឡាករហូឡង់ ដែលមិនចំឈ្មោះ អំឡុងពេលធ្វើបទសម្ភាសន៍ នៅក្រោយការប្រកួត។
ប៉ុន្តែលោក Scaloni បាននិយាយការពារការប្រព្រឹត្តនៃកីឡាកររបស់គាត់ នៅឯសន្និសីទសារព័ត៌មាន មុនការប្រកួត កាលពីថ្ងៃចន្ទ ដោយទទូចថា ក្រុមរបស់គាត់មិនមានអ្វីត្រូវធ្វើការសុំទោសនោះឡើយ។
អ្នកចាត់ការក្រុមអាហ្សង់ទីនវ័យ ៤៤ឆ្នាំ បាននិយាយថា៖ «ការប្រកួតកាលពីថ្ងៃមុន ត្រូវបានលេងតាមវិធីដ៏ត្រឹមត្រូវ ពីក្រុមទាំង២។ នោះគឺជាបាល់ទាត់។ ខ្ញុំមិនទទួលស្គាល់គំនិត ដែលថា យើងមិនដឹងពីវិធី ក្នុងការទទួលបានជ័យជម្នះនោះទេ។ ការប្រកួតត្រូវបានលេង នៅក្នុងវិធីដ៏ត្រឹមត្រូវ»។
កីឡាករ Messi ដែលបានភ្លក្សរសជាតិបរាជ័យដ៏ជូរចត់ ក្នុងវគ្គផ្តាច់ព្រ័ត្រ កាលពីឆ្នាំ២០១៤ ដោយសារក្រុមអាល្លឺម៉ង់ ទំនងជាមានឱកាសចុងក្រោយ នៅអាយុ ៣៥ឆ្នាំ ដើម្បីបានប្រៀបផ្ទឹមជាមួយមិត្តរួមជាតិលោក Diego Maradona និងបានលើកពានរង្វាន់ នៅ World Cup នេះ៕