ក្រុមហ៊ុនអាកាសចរណ៍ជាតិរបស់ប្រទេសម៉ារ៉ុក កំពុងបន្ថែមជើងហោះហើរទៅមកចំនួន ៣០ជើងទៀត សម្រាប់ឱ្យអ្នកគាំទ្រ ដែលពេញដោយក្ដីសុខរីករាយធ្វើដំណើរទៅកាន់ប្រទេសកាតា ដើម្បីចូលរួមទស្សនាការប្រកួតវគ្គពាក់កណ្តាលផ្តាច់ព្រ័ត្រជាប្រវត្តិសាស្រ្តរបស់ក្រុមជម្រើសជាតិ ក្នុងព្រឹត្តិការណ៍ World Cup នៅថ្ងៃពុធ ដែលត្រូវជួបជាមួយក្រុមបារាំង។
ក្រុមហ៊ុនបានឱ្យដឹងនៅក្នុងសេចក្តីថ្លែងការណ៍ កាលពីថ្ងៃចន្ទថា៖ «ដើម្បីអនុញ្ញាតឱ្យប្រជាជនម៉ារ៉ុកជាច្រើន ដែលចង់ទៅគាំទ្រក្រុមជម្រើសជាតិ ដើម្បីទទួលបានបទពិសោធន៍ពីការប្រកួត ក្នុងវគ្គពាក់កណ្ដាលផ្ដាច់ព្រ័ត្រ នៅ World Cup ក្រុមហ៊ុន Royal Air Maroc បានរៀបចំបង្កើតនូវជើងហោះហើរដោយផ្ទាល់ រវាងក្រុង Casablanca និងក្រុងដូហា»។
ក្រុមម៉ារ៉ុកបានយកឈ្នះក្រុមព័រទុយហ្គាល់របស់កីឡាករ Cristiano Ronaldo ក្នុងលទ្ធផល ១-០ កាលពីថ្ងៃសៅរ៍ ដែលបានក្លាយជាក្រុមអាហ្រ្វិក ឬអារ៉ាប់ដំបូងគេ ក្នុងការដណ្ដើមបានសិទ្ធិឡើងទៅវគ្គ ៤ក្រុមចុងក្រោយ នៅ World Cup ហើយបាននាំឱ្យមានការអបអរសាទរយ៉ាងខ្លាំង ពីទូទាំងពិភពអារ៉ាប់។
ក្រុមហ៊ុនអាកាសចរណ៍របស់ព្រះរាជាណាចក្រអាហ្រ្វិកខាងជើងមួយនេះ បានហៅវាថា ជា «គុណសម្បត្តិជាប្រវត្តិសាស្ត្រ» ហើយបាននិយាយថា យន្តហោះខ្នាតយក្ស នឹងដំណើរការជើងហោះហើរទៅមកចំនួន ៣០ជើង ដែលចាកចេញ នៅថ្ងៃអង្គារ និងថ្ងៃពុធ ដើម្បីឱ្យទាន់ពេលប្រកួត។
នៅមុនការប្រកួតទល់នឹងក្រុមព័រទុយហ្គាល់ អ្នកគាំទ្របានត្អូញត្អែរតាមប្រព័ន្ធអ៊ិនធឺណេតពីភាពច្របូកច្របល់ ដោយមានមនុស្សកកកុញច្រើនពេក នៅឯអាកាសយានដ្ឋាន ក្នុងទីក្រុង Casablanca ដែលជាក្រុងសេដ្ឋកិច្ចរបស់ប្រទេសម៉ារ៉ុក។
គ្រូបង្វឹករបស់ក្រុមម៉ារ៉ុកលោក Walid Regragui ដែលចូលកាន់តំណែងទើបបាន ៣ខែ នៅមុនពេលចាប់ផ្តើមការប្រកួតប្រជែងនេះ បានហៅអ្នកគាំទ្រម៉ារ៉ុកម្តងហើយម្តងទៀតថា ជា «សមាជិកទី ១២ របស់ក្រុម»៕
