ខ្សែប្រយុទ្ធ Cristiano Ronaldo បាននិយាយកាលពីថ្ងៃអាទិត្យថា មិនមានប្រយោជន៍នោះឡើយ ក្នុងការប្រតិកម្មតប ដោយចិត្តកំពុងតែឡើងកម្ដៅនាពេលនេះ នៅពេលដែលរូបគេបានឆ្លើយតបទៅនឹងការធ្លាក់ពីព្រឹត្តិការណ៍ World Cup របស់ក្រុមជម្រើសជាតិព័រទុយហ្គាល់។
![](https://cambodiaflashnews.com/wp-content/uploads/2021/06/top-banner.gif)
កីឡាករ Ronaldo បានបន្តស្នាក់នៅប្រទេសកាតា ខណៈដែលកីឡាករ ក្នុងក្រុមព័រទុយហ្គាល់ជាច្រើន បានវិលត្រឡប់ទៅប្រទេសវិញ ហើយយន្តហោះរបស់ពួកគេ បានចុះចតនៅទីក្រុងលីសបោន (Lisbon) កាលពីរសៀលថ្ងៃអាទិត្យ។
«ក្នុងការបានឈ្នះពានរង្វាន់ World Cup សម្រាប់ក្រុមព័រទុយហ្គាល់ គឺជាក្តីសុបិនដ៏មានមហិច្ឆតាខ្ពស់ និងធំបំផុត ក្នុងអាជីពរបស់ខ្ញុំ។ ជាសំណាងល្អ ដែលខ្ញុំបានឈ្នះពានរង្វាន់អន្តរជាតិជាច្រើន ក្នុងនោះរួមទាំងសម្រាប់ក្រុមព័រទុយហ្គាល់ផងដែរ»។ នេះជាការសរសេររៀបរាប់របស់កីឡាករ Ronaldo នៅលើបណ្ដាញសង្គម Instagram។
សារ ដែលបានផូស្ត (បង្ហោះ) នេះ មិនបាននិយាយពីការចូលនិវត្តន៍ពីក្រុមជម្រើសជាតិនោះទេ ប៉ុន្តែរូបគេបានចាប់ផ្តើមការប្រកួត ២លើកចុងក្រោយរបស់ក្រុមព័រទុយហ្គាល់ នៅប្រទេសកាតា ក្នុងនាមជាកីឡាករបម្រុង ដែលការសម្រេចចិត្តនេះ បង្កឱ្យមានការជជែកដេញដោល ទាំងនៅក្នុងប្រទេសព័រទុយហ្គាល់ និងទូទាំងពិភពបាល់ទាត់។
រូបគេបានសរសេរបន្ថែមថា៖ «យើងសង្ឃឹមថា ពេលវេលានឹងក្លាយជាអ្នកប្រឹក្សាដ៏ល្អ និងអនុញ្ញាតឱ្យមនុស្សគ្រប់គ្នាធ្វើការសន្និដ្ឋានដោយខ្លួនឯង»។
ការបង្ហោះសារ នៅលើ Instagram នេះ មានអមដោយរូបថត ដែលបង្ហាញពីកីឡាករ Ronaldo ឱនក្បាលដើរចេញពីទីលាន ក្នុងទីក្រុងដូហា បន្ទាប់ពីចាញ់ក្រុមម៉ារ៉ុក ១-០ ក្នុងវគ្គ ៨ក្រុមចុងក្រោយ កាលពីថ្ងៃសៅរ៍។ ក្នុងវ័យ ៣៧ឆ្នាំ កីឡាករ Ronaldo បានលេងក្នុងព្រឹត្តិការណ៍ World Cup ជាលើកទី៥។ ភ្លាមៗ ពេលសំឡេងកញ្ចែចុងក្រោយបានបន្លឺឡើង រូបគេបានដើរចូលទៅក្នុងឧម្មង្គ អមដោយទឹកភ្នែកហូរលើផ្ទៃមុខ។
Ronaldo គ្មានក្លិបនោះឡើយ ក្រោយចែកផ្លូវគ្នាយ៉ាងជូរចត់ជាមួយក្រុមបិសាចក្រហម Manchester United។ យោងតាមបណ្ដាញសារព័ត៌មាន នៅព័រទុយហ្គាល់ កីឡាករ Ronaldo បានគំរាមចាកចេញពីក្រុមជម្រើសជាតិ បន្ទាប់ពីរូបគេត្រូវបានទម្លាក់ចេញពីកីឡាករជម្រើសដំបូង ប៉ុន្តែត្រូវបានបដិសេធដោយគ្រូបង្វឹក លោក Fernando Santos ដែលគ្រោងនឹងជួបជាមួយសហព័ន្ធបាល់ទាត់ជាតិ ក្នុងពេលឆាប់ៗនេះ ដើម្បីពិភាក្សាពីអនាគតរបស់គាត់៕