ភ្នំពេញ៖លោក ផាន់ ផល្លា ប្រធានក្រុមប្រឹក្សាភិបាលធនាគារ SME បានលើកទឹកចិត្តឱ្យសហគ្រាសធុនតូច និងមធ្យមនៅកម្ពុជា ដែលដាក់សំណើកម្ចីពីធនាគារសហគ្រាសធុនតូចនិងមធ្យម (SME Bank) ជាប្រភេទប្រាក់រៀលដើម្បីទទួលបាននូវអាត្រាការប្រាក់ទាប ដែលអាចនឹងធ្វើឱ្យពួកគេទទួលបានផលចំណេញ។
លោក ផាន់ ផល្លា បានលើកឡើងថា៖ធនាគារសហគ្រាសធុនតូច និងមធ្យម មានការប្តេជ្ញាចិត្តខ្ពស់ ក្នុងការជំរុញការផ្តល់កម្ចីជាប្រាក់រៀល ដើម្បីលើកកម្ពស់រូបិយបណ្ណក្នុងស្រុក ពោលគឺធនាគារនឹងផ្តល់កម្ចីជាប្រាក់រៀលក្នុង អត្រាការប្រាក់ទាបជាងកម្ចី ជាប្រាក់ដុល្លារអាមេរិក ០.២៥% សម្រាប់វិស័យធម្មតា និងរហូតដល់ ០.៥% សម្រាប់វិស័យអាទិភាព។ ក្នុងន័យនេះ សម្រាប់កម្ចីក្នុងវិស័យអទិភាព អត្រាការប្រាក់ត្រឹមតែ៥%ប៉ុណ្ណោះក្នុងមួយឆ្នាំ។
លោកបានគូសបញ្ជាក់បន្ថែមថា បើទោះបីអត្រាការប្រាក់ នៅលើទីផ្សារអន្តរជាតិ កើនឡើងក៏ដោយ ប៉ុន្តែធនាគារសហគ្រាសធុនតូច និងមធ្យម នឹងរក្សានូវការផ្ដល់កម្ចីក្នុងអត្រាការប្រាក់សមរម្យ ដូចដែលមានចែងក្នុងយុទ្ធសាស្ត្រធុរកិច្ច របស់ធនាគារសហគ្រាសធុនតូច និងមធ្យម គឺ ផ្ដល់កម្ចីជាមួយនឹងអត្រាការប្រាក់ចន្លោះពី ៥.៨៨% និង ៦.៨៨% ក្នុងមួយឆ្នាំសម្រាប់វិស័យអាទិភាព និងផ្ដល់កម្ចីជាមួយនឹងអត្រាការប្រាក់ថេរត្រឹម ៧.៥% សម្រាប់វិស័យធម្មតា។ ផ្ដល់កម្ចីជាមួយអត្រាការប្រាក់សម្បទានបំផុត ពោលត្រឹម ៥.៥% សម្រាប់សហគ្រាសធុនតូច និងមធ្យមដែលមានម្ចាស់ជាស្ត្រី ប្រសិនបើសហគ្រាសទាំងនោះចុះបញ្ជីត្រឹមត្រូវ និងស្ថិតក្នុងវិស័យអាទិភាព។
បើតាមលោក ផាន់ ផល្លា នាពេលបច្ចុប្បន្ននេះ ធនាគារសហគ្រាសធុនតូចនិងមធ្យមកម្ពុជាកំពុងដំណើរការអនុវត្តគម្រោងហិរញ្ញប្បទាន និងផលិតផលមួយចំនួន ដូចជា ហិរញ្ញប្បទាននៃសហគ្រាសធុនតូច និងមធ្យមកម្ពុជា (CSS), ហិរញ្ញប្បទានសម្រាប់វិស័យឌីជីថល និងទំនើបកម្ម (CDAS),ហិរញ្ញប្បទានសម្រាប់សហគ្រិនស្ត្រីកម្ពុជា (CWES),ហិរញ្ញប្បទានស្តារសហគ្រាសធុនតូចនិងមធ្យមកម្ពុជាឡើងវិញ (CRSS),ហិរញ្ញប្បទានគ្មានទ្រព្យធានា( Non -collateralized loan),គម្រោងសហហិរញ្ញប្បទានស្តារវិស័យទេសចរណ៍ឡើងវិញ (TRCS) និង ឥណទានវិបារូបណ៍ (OD)៕ដោយៈសិរីមតី
