ប្រធានកីឡាបាល់ទាត់របស់តំបន់អាមេរិកឡាទីន ឬអាមេរិកខាងត្បូង (CONMEBOL) បាននិយាយ កាលពីថ្ងៃអាទិត្យថា FIFA (សហព័ន្ធបាល់ទាត់អន្តរជាតិ) គួរតែផ្ដល់ការគោរពដល់កេរដំណែលរបស់លោក Pele និងសពលោក Diego Maradona ដោយការប្រគល់ព្រឹត្តិការណ៍ World Cup 2030 ដែលគ្រប់ខួប ១០០ឆ្នាំដល់ទ្វីបនេះ។
ដោយមានការប្រកួតប្រជែងកាន់តែខ្លាំងឡើងៗ មុនពេលស្ថាប័នបាល់ទាត់ពិភពលោកសម្រេច ចំពោះព្រឹត្តិការណ៍នេះ ក្នុងឆ្នាំ២០២៤ លោក Alejandro Dominguez បាននិយាយថា មិនគួរមានការផ្តោតអារម្មណ៍ ចំពោះលុយកាក់តែម៉្យាង ក្នុងដំណើរការនេះនោះទេ។
ប្រទេសអ៊ុយរូហ្គាយ ដែលបានសិទ្ធិរៀបចំ World Cup ដំបូងបង្អស់ ដែលមានតែ ១៣ក្រុមចូលរួម ក្នុងឆ្នាំ១៩៣០ បានរួមគ្នាជាមួយប្រទេសអាហ្សង់ទីន ស៊ីលី និងប៉ារ៉ាហ្គាយ ដើម្បីដេញថ្លៃសុំសិទ្ធិធ្វើម្ចាស់ផ្ទះសម្រាប់ព្រឹត្តិការណ៍ដ៏ធំនេះ ក្នុងឆ្នាំ២០៣០ ដែលនឹងជាលើកទី ២ ដោយមាន ៤៨ក្រុម។
តែបញ្ហាប្រឈមចម្បង គឺការដេញថ្លៃរួមគ្នាពីប្រទេសអេស្ប៉ាញ ព័រទុយហ្គាល់ និងអ៊ុយក្រែន ដែលមានការគាំទ្រពី UEFA (សហព័ន្ធបាល់ទាត់អឺរ៉ុប)។ មានសេចក្ដីរាយការណ៍ថា ប្រទេសអារ៉ាប៊ីសាអ៊ូឌីត អាចនឹងចាប់ផ្តើមការដេញថ្លៃរួមជាមួយប្រទេសអេហ្ស៊ីប និងក្រិក។
នៅពេលត្រូវបានសួរ នៅឯកម្មវិធីមួយ ដែលធ្វើឡើង ដើម្បីគោរពដល់លោក Pele ដែលកំពុងឈឺថា តើអតីតវីរបុរសរបស់ប្រេស៊ីល ឬកេរដំណែលរបស់សពលោក Maradona ដែលជាអតីតកីឡាករដ៏ឆ្នើមបំផុតរបស់ក្រុមអាហ្សង់ទីន អាចជួយជំរុញដល់ការសម្រេចនេះទេ លោក Dominguez បាននិយាយថា FIFA ត្រូវតែជ្រើសរើស រវាងបាល់ទាត់ និងប្រាក់។
លោកប្រធានរបស់ CONMEBOL បានលើកឡើងថា៖ «សំណួរនេះ គឺសម្រាប់ FIFA ថា តើពួកគេគ្រោងនឹងធ្វើអ្វីជាមួយប្រវត្តិសាស្ត្រ ដែលបង្កើតឡើងដោយលោក Pele និងលោក Maradona ឬទេ?
«ប្រាកដណាស់ វាគួរតែទៅវិលទៅរកឫសគល់ដើមវិញ ព្រោះបាល់ទាត់មិនមែនគិតតែពីលុយកាក់នោះទេ។ វាមិនគួរនិយាយអំពីការប្រកួតប្រជែងថា អ្នកណាជាអ្នករកលុយច្រើនជាងគេបំផុត សម្រាប់ World Cup។ វាក៏គួរតែពាក់ព័ន្ធផងដែរដល់ការទទួលស្គាល់ថា តើអ្នកណាអាចធ្វើឱ្យព្រឹត្តិការណ៍នេះ ដំណើរការទៅបាន»។ នេះជាការបន្ថេមរបស់លោក Dominguez ដោយសំដៅទៅលើលោក Pele និងសពលោក Maradona ក៏ដូចជាប្រទេសអ៊ុយរូហ្គាយ ដែលជាម្ចាស់ផ្ទះនៃការប្រកួត World Cup នេះ ដំបូងគេបង្អស់។
លោក Dominguez បានប្រាប់ថា CONMEBOL ក៏បានស្នើឱ្យប្រេស៊ីលផ្លាស់ប្តូរសម្លៀកបំពាក់ជម្រើសជាតិរបស់ខ្លួនផងដែរ ដើម្បីជាការគោរពដល់លោក Pele វ័យ ៨២ឆ្នាំ ដែលបានសម្រាកនៅមន្ទីរពេទ្យក្នុងខែនេះ ខណៈដែលរូបគាត់ត្រូវតស៊ូប្រយុទ្ធនឹងជំងឺមហារីក៕
