ភ្នំពេញ៖បុរសម្នាក់ផ្ទុះអាវុធជាច្រើនគ្រាប់ដើម្បីទប់ទល់សភាពការណ៍ចំពោះមុខ បណ្ដាលឱ្យមនុស្សចំនួន៤នាក់រងរបួស ខណៈពេលក្មេងស្ទាវមួយក្រុមដេញវ៉ៃនិងកាប់លើបុរស២នាក់។
ហេតុការណ៍នេះបានកើតឡើងនៅត្រង់ច្រមុះជ្រូកក្បាលថ្នល់ តាមផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន កាលពីរំលងអធ្រាត្រឈានចូលថ្ងៃទី១២ ខែធ្នូ។
អ្នកនៅជិតទីនោះបានឱ្យដឹងថា ដំបូងមានបុរស២នាក់ទាស់សម្ដីជាមួយក្មេងស្ទាវមួយក្រុមជិះម៉ូតូ៣គ្រឿងមានគ្នាជាច្រើននាក់។ពួកគេបានដេញកាប់គ្នា ហើយក្មេងស្ទាវបាននាំគ្នាយកដុំថ្មគប់និងយកកាំបិតបុ័ងតោដេញកាប់យ៉ាងប្រសេកប្រសាចពេញមុខហាងបាយមួយ។ពេលនោះមានបុរសម្នាក់ដែលអង្គុយហូបបាយនៅក្នុងហាងក្បែរនោះក៏ចេញមកក្រៅដកកាំភ្លើងខ្លីបាញ់ឡើងលើ១គ្រាប់ដើម្បីបំបែកក្រុមក្មេងស្ទាវ។
ពេលបាញ់ក្រុមក្មេងស្ទាវមិនខ្លាចកាំភ្លើង ក៏ស្ទុះចូលទៅរកកាប់ តែធ្វើឱ្យខ្មាន់កាំភ្លើងបាញ់បន្ថែមជាច្រើនគ្រាប់ទៀតតម្រង់ទៅក្មេងស្ទាវទាំងនោះបណ្ដាលឱ្យរងរបួស៤នាក់ រួចឡើងជិះរថយន្តព្រូសគេចខ្លួនបាត់។ចំណែកជនរងគ្រោះត្រូវបានបញ្ជូនទៅមន្ទីរពេទ្យដើម្បីសង្គ្រោះ។
បន្ទាប់ពីកើតហេតុ កម្លាំងកងរាជអាវុធហត្ថបានមកដល់យកសម្បកគ្រាប់និងស្រោមកាំភ្លើងព្រមទាំងយកបក្ខពួកក្មេងស្ទាវម្នាក់ទៅសួរនាំដើម្បីស្រាវជ្រាវបន្ត៕ដោយ៖វិចិត្រ
