ភ្នំពេញ៖ក្រសួងសាធារណការ និងដឹកជញ្ជូន បាននិងកំពុងរៀបចំផែនការយុទ្ធសាស្ត្រទំនើបកម្មរថយន្តដឹកទំនិញធុនធ្ងន់ឆ្នាំ២០២២- ២០៣០។
បើយោងតាមក្រសួងសាធារណការ ផែនការយុទ្ធសាស្ត្រទំនើបកម្មរថយន្តដឹកទំនិញធុនធ្ងន់នេះមានគោលបំណងលើកកម្ពស់លក្ខខណ្ឌរថយន្តដឹកទំនិញធុនធ្ងន់ និងអាជីវកម្មដឹកជញ្ជូននៅកម្ពុជាឱ្យកាន់តែមានប្រសិទ្ធភាព និងមិនប៉ះពាល់ដល់បរិស្ថាន តាមរយៈគោលដៅយុទ្ធសាស្ត្រចំនួនបីរួមមាន៖ (១)ការលើកទឹកចិត្តឱ្យប្រើប្រាស់រថយន្តថ្មីៗសម្រាប់ដឹកទំនិញ (២) ការជំរុញឱ្យប្រើប្រាស់រថយន្តដឹកទំនិញដែលមានបច្ចេកវិទ្យាទំនើប និង (៣)ការកែលម្អប្រតិបត្តិការ និងអាជីវកម្មដឹកជញ្ជូនទំនិញ។
រថយន្តដឹកទំនិញលើសទម្ងន់ និងយានយន្តចាស់ៗមិនត្រឹមតែឱ្យខូចខាតផ្លូវថ្នល់និងបរិស្ថានក្នុងរយៈពេលវែងប៉ុណ្ណោះទេ ប៉ុន្ដែថែមទាំងធ្វើឱ្យប៉ះពាល់ដល់សុវត្ថិភាពចរាចរណ៍ផងដែរ។ ការអនុវត្ត បានជោគជ័យនូវផែនការយុទ្ធសាស្ត្រទំនើបកម្មរថយន្តដឹកទំនិញធុនធ្ងន់ឆ្នាំ២០២២-២០៣០គឺជាកត្តាសំខាន់ណាស់ដើម្បីចូលរួមលើកកម្ពស់ការអនុវត្តស្តង់ដារជាតិស្តីពីការបំភាយឧស្ម័នសម្រាប់រថយន្តនាំចូល រួមទាំងរថយន្តដឹកទំនិញធុនធ្ងន់ផងដែរ។
ដើម្បីអនុវត្តឱ្យបានសម្រេចពេញលេញនូវគោលដៅ នៃផែនការយុទ្ធសាស្ត្រនេះ យុទ្ធសាស្ត្រចំនួន៤ ត្រូវបានស្នើឡើង៖ យុទ្ធសាស្ត្រទី១. ការផ្លាស់ប្តូររថយន្តដឹកទំនិញចាស់ៗយុទ្ធសាស្ត្រទី២.ការលើកទឹកចិត្តឱ្យប្រើប្រាស់រថយន្តដឹកទំនិញដែលមានមេត្រីភាពនឹងបរិស្ថាន យុទ្ធសាស្ត្រទី៣.ការកែលម្អប្រតិបត្តិការរថយន្តដឹកទំនិញនិងយុទ្ធសាស្ត្រទី៤.ការធ្វើទំនើបកម្មអាជីវកម្មនិងប្រតិបត្តិការដឹកជញ្ជូនទំនិញ
ដើម្បីអនុវត្តបានជោគជ័យផែនការយុទ្ធសាស្ត្រទំនើបកម្មរថយន្តដឹកទំនិញធុនធ្ងន់ ឆ្នាំ២០២២-២០៣០ គឺទាមទារនូវការប្ដេជ្ញាចិត្តខ្ពស់ពីវិស័យសាធារណៈ និងវិស័យឯកជន រួមមានក្រសួង-ស្ថាប័នពាក់ព័ន្ធសំខាន់ៗ និងវិស័យឯកជន រួមទាំងប្រតិបត្តិការអាជីវកម្មដឹកជញ្ជូន។ សំខាន់បំផុត គឺកិច្ចសហការយ៉ាងស្អិតរមួត និងសកម្មពីគ្រប់ផ្នែកពាក់ព័ន្ធទាំងអស់ ដើម្បីធានាដល់ការអនុវត្តផែនការយុទ្ធសាស្ត្រនេះឱ្យបានពេញលេញ និងល្អប្រសើរ៕ដោយៈសិរីមតី
