កីឡាករដ៏ឆ្នើម Neymar របស់ក្រុមប្រេស៊ីល កាលពីថ្ងៃសុក្រ បានព្រលយពាក្យថា រូបគេអាចនឹងចូលនិវត្តន៍ពីបាល់ទាត់អន្តរជាតិ ដោយនិយាយថា មិនអាចធានា ១០០ភាគរយទេថា នឹងលេងឱ្យក្រុមជម្រើសជាតិម្តងទៀត បន្ទាប់ពីក្រុមយក្សរបស់តំបន់អាមេរិកឡាទីនមួយនេះ ត្រូវហាលអាវ (ធ្លាក់ចេញ) ដោយសារចាញ់ក្រុមក្រូអាស៊ី ក្នុងវគ្គប៉េណាល់ទីកាត់ក្ដី។
![](https://cambodiaflashnews.com/wp-content/uploads/2021/06/top-banner.gif)
ដោយនិយាយបន្ទាប់ពីរងការបរាជ័យ ក្នុងការប្រកួតវគ្គ ១/៤ ផ្ដាច់ព្រ័ត្រ ក្នុងព្រឹត្តិការណ៍ World Cup នៅប្រទេសកាតា ស៊ុបភើស្តាររបស់ក្លិប Paris Saint-Germain បានលើកឡើងថា រូបគេអាចចាកចេញហើយ។
«ខ្ញុំមិនបានបិទទ្វារ សម្រាប់ក្រុមជម្រើសជាតិទេ ប៉ុន្តែខ្ញុំក៏មិនធានា ១០០ភាគរយថា ខ្ញុំនឹងត្រឡប់មកវិញដែរ។ ខ្ញុំត្រូវតែគិតបន្តិចថែមទៀតអំពីរឿងនេះ និងអំពីអ្វី ដែលជារឿងត្រឹមត្រូវ សម្រាប់ខ្ញុំ និងក្រុមជម្រើសជាតិ»។ នេះជាសម្ដីរបស់កីឡាករ Neymar វ័យ ៣០ឆ្នាំ ដែលបាននិយាយដោយសំឡេងញ័រៗ អមដោយអារម្មណ៍រំជួលចិត្ត។
កីឡាករ Neymar បានតាមស្មើកំណត់ត្រាចំនួនគ្រាប់បាល់សរុបរបស់លោក Pele ដែលរកបាន ៧៧គ្រាប់ សម្រាប់ក្រុមប្រេស៊ីល ដោយការស៊ុតបាល់បញ្ចូលទីយ៉ាងអស្ចារ្យ កាលពីថ្ងៃសុក្រ ប៉ុន្តែគួរឱ្យសោកស្ដាយគ្រាប់បាល់នាំមុខរបស់គេនោះ ត្រូវបានបំផ្លាញដោយគ្រាប់បាល់របស់កីឡាករ Bruno Petkovic ដែលជួយឱ្យក្រុមក្រូអាស៊ីតាមស្មើ នៅប្រមាណជា ៣នាទីចប់ម៉ោងបន្ថែមពិសេស។
ក្នុងវគ្គប៉េណាល់ទីកាត់ក្ដី កីឡាកររបស់ក្រុមប្រេស៊ីលរូបនេះ មិនបានស៊ុតនោះទេ។ ការព្យាយាមទាត់របស់កីឡាករ Rodrygo ត្រូវបានជួយសង្គ្រោះដោយអ្នកចាំទី Dominik Livakovic ហើយកីឡាករ Marquinhos ទាត់បុកបង្គោលទី ខណៈដែលកីឡាកររបស់ក្រុមក្រូអាស៊ី បានស៊ុតបញ្ចូលទីទាំង ៤គ្រាប់ ដែលនាំឱ្យក្រុមរបស់អឺរ៉ុបមួយនេះ ឈ្នះក្នុងលទ្ធផល ៤-២។
កាលពី ៤ឆ្នាំមុន នៅប្រទេសរុស្ស៊ី កីឡាករ Neymar និងក្រុមប្រេស៊ីល បានធ្លាក់ចេញដោយឈឺចាប់ នៅដំណាក់កាលនេះដូចគ្នា ដោយសារស្នាដៃរបស់ក្រុមបែលហ្ស៊ិក។ ក្នុងឆ្នាំ២០១៤ ក្នុងនាមជាម្ចាស់ផ្ទះ ក្រុមប្រេស៊ីល ត្រូវអាម៉ាស់មុខ ដោយសារក្រុមអាល្លឺម៉ង់ ក្រោយចាញ់ដល់ទៅ ៧-១ ក្នុងវគ្គពាក់កណ្តាលផ្តាច់ព្រ័ត្រ ដែលកីឡាករ Neymar មិនបានចូលលេងនោះឡើយ ដោយសារមានរបួស។
កីឡាករ Neymar បាននិយាយបន្ថែមថា៖ «វាជាការមានអារម្មណ៍ដ៏សែនអាក្រក់បំផុត ខ្ញុំគិតថា នេះជាអារម្មណ៍ដ៏អាក្រក់ជាងអ្វី ដែលបានកើតឡើង នៅ World Cup ពីលើកមុន។ វាគឺពិតជាពិបាក ក្នុងការស្វែងរកពាក្យពេចន៍មកពណ៌នាណាស់ នាពេលនេះ»៕