អតីតជំនួយការនិងទីប្រឹក្សានយោបាយរុស្ស៊ីម្នាក់បានទម្លាយព័ត៌មានរសើបថា ប្រធានាធិបតីរុស្ស៊ី លោកវ្ល៉ាឌឹមៀរពូទីន មានគម្រោងភៀសខ្លួនទៅកាន់អាម៉េរិកខាងត្បូងហើយ ប្រសិនបើក្នុងករណីដែលចាញ់សង្រ្គាមនៅអ៊ុយក្រែន។
នេះដោយយោងតាមគេហទំព័រ Business Insider បានដកស្រង់ការអះអាងរបស់អតីតជំនួយការ និងធ្លាប់ជាទីប្រឹក្សាវិមានក្រឹមឡាំង លោក Galyamov លើបណ្តាញតេលេក្រាមគណនីផ្ទាល់ខ្លួន។ លោកបានអះអាងថា ប្រធានាធិបតីរុស្ស៊ី លោកវ្ល៉ា ឌឹមៀរពូទីន ក៏ដូចជារដ្ឋបាលនៃវិមានក្រឹមឡាំងកំពុងមានគម្រោងផែនការបម្រុងទុកជម្លៀសខ្លួននៅនិទាឃរដូវ ពិសេសក្នុងករណីដែលសង្រ្គាមនៅអ៊ុយក្រែនបរាជ័យ។ Galyamov បាននិយាយដោយផ្អែកលើបណ្តាញរបស់លោកថា លោកពូទីនក៏នឹងគ្រោងធ្វើដំណើរទៅកាន់ប្រទេសអាម៉េរិកខាងត្បូងផងដែរ បើគាត់ចាញ់សង្រ្គាម ខណៈក្នុងនោះមានជម្រើសពីរគឺប្រទេស អាហ្សង់ទីន និងវេណេហ្ស៊ុយអេឡា។
លោកបន្តថា ដំបូងឡើយលោកពូទីន បានពិចារណាគ្រោងទៅកាន់ប្រទេសចិន ប៉ុន្តែក្រោយមកបានច្រានចោលគំនិតនេះ ដោយឈរលើមូលដ្ឋានថា ឱកាសនៃកិច្ចសហប្រតិបត្តិការពីចិនទំនងជាមានតិចតួចបំផុត។
ទោះបីជាយ៉ាងណាក៏ដោយ ប្រភពឯករាជ្យមិនអាចផ្ទៀងផ្ទាត់ការអះអាងរបស់អតីតមន្រ្តីរុស្ស៊ីនេះបានឡើយ។ គួរជម្រាបថា លោក Galyamov គឺជាក្រុមសរសេរសុន្ទរកថារបស់លោកពូទីនកាលពីឆ្នាំ២០០០ ដល់ឆ្នាំ ២០០១ និងឆ្នាំ ២០០៨ ដល់ឆ្នាំ ២០១០ ។ តែក្រោយមកចាប់តាំងពីឆ្នាំ២០១៨មក គាត់បានរស់នៅនិរទេសក្នុងប្រទេសអ៊ីស្រាអែល៕
ប្រភព៖ Business Insider
ប្រភពរូប៖Business Insider
ប្រែសម្រួល៖សុខ តុលា