ខ្សែបយុទ្ធ Harry Kane កំពុងកៀកៗនឹងការបានក្លាយជាអ្នកស៊ុតបញ្ចូលទីច្រើនជាងគេបង្អស់ជាកំណត់ត្រារបស់ក្រុមអង់គ្លេស ប៉ុន្តែកីឡាករឆ្នើមមិនអាត្មានិយមរូបនេះ នឹងសុខចិត្តប្ដូរនិមិត្តរូបជាប្រវត្តិសាស្ត្រនោះដោយរីករាយ ដើម្បីមានឱកាស ក្នុងការជួយនាំក្រុមជម្រើសជាតិរបស់ខ្លួនឱ្យបានឈ្នះពានរង្វាន់ ក្នុងព្រឹត្តិការណ៍ World Cup។
កីឡាករ Kane ធ្វើដំណើរឆ្ពោះទៅវគ្គ ៨ក្រុមចុងក្រោយរបស់ក្រុមអង់គ្លេស ទល់នឹងក្រុមម្ចាស់ជើងឯកចាស់បារាំង នាថ្ងៃសៅរ៍នេះ ដោយតាមតែ ១គ្រាប់ពីក្រោយអ្នករកគ្រាប់បាល់បានច្រើនជាងគេជាកំណត់ត្រារបស់ក្រុមកំណាច គឺលោក Wayne Rooney។
កីឡាករវ័យ ២៩ឆ្នាំ បានទម្លុះសំណាញ់ទីលើកដំបូង នៅ World Cup ឆ្នាំនេះ ក្នុងជ័យជម្នះ ៣-០ លើក្រុមសេណេហ្គាល់ ក្នុងការប្រកួតវគ្គ ១៦ក្រុម កាលពីថ្ងៃអាទិត្យ ដោយធ្វើឱ្យគ្រាប់បាល់អាជីពសរុបរបស់គេ ក្នុងក្រុមអង់គ្លេស មានចំនួន ៥២គ្រាប់។ កីឡាករ Kane ក៏ធ្វើបានលើសលោក Gary Lineker ក្នុងនាមជាអ្នកស៊ុតបញ្ចូលទីនាំមុខគេគ្រប់កាលរបស់អង់គ្លេស ក្នុងការប្រកួតធំៗ ដោយរកបាន ១១គ្រាប់។
គ្រូបង្វឹកក្រុមអង់គ្លេស លោក Gareth Southgate មានអារម្មណ៍ធូរស្រាល ពេលឃើញកីឡាករ Kane បញ្ចប់ចំពោះមន្ទិលសង្ស័យពីទម្រង់លេងរបស់គេ ដោយនិយាយថា៖ «ខ្សែប្រយុទ្ធកណ្តាលរូបណាក៏ដោយ ចង់ឈានដល់ចំណុចនេះ ហើយពិតណាស់ រូបគេបានបញ្ចប់រាល់ការងឿងឆ្ងល់ទាំងអស់»។
ដោយបានឈ្នះស្បែកជើងមាស នៅ World Cup 2018 ជាមួយនឹងចំនួនគ្រាប់បាល់ ៦គ្រាប់ ក្នុងដំណើរផ្លូវរបស់ក្រុមអង់គ្លេស ដែលឡើងរហូតដល់វគ្គពាក់កណ្តាលផ្តាច់ព្រ័ត្រនោះ កីឡាករ Kane បានដឹងពីតម្លៃដ៏ធំធេងរបស់ខ្លួន ចំពោះក្រុមរួចស្រេចហើយ។
ប៉ុន្តែភាពចាស់ទុំ និងនិស្ស័យមិនគិតតែពីប្រយោជន៍ផ្ទាល់ខ្លួនរបស់រួបគេ ក៏ជាធាតុផ្សំដ៏សំខាន់ សម្រាប់ភាពជោគជ័យរបស់ក្រុមអង់គ្លេសផងដែរ ខណៈដែលបានធ្វើតួនាទី ដែលអាចនឹងឱ្យរូបគេរកគ្រាប់បាល់បានតិច ប៉ុន្តែជួយមិត្តរួមក្រុម ដូចជាកីឡាករ Phil Foden និង Bukayo Saka រះឡើងយ៉ាងត្រដែត។
លោក Southgate បានកត់សម្គាល់ឃើញនូវចំណែកសំខាន់របស់កីឡាករ Kane ក្នុងការប្រកួតជាមួយក្រុមសេណេហ្គាល់ នៅពេលដែលខ្សែប្រយុទ្ធរបស់ក្រុម Tottenham រូបនេះ បានទម្លាក់ទៅលេងនៅតំបន់កណ្តាល ដើម្បីសហការជាមួយកីឡាករ Jude Bellingham ដែលទុកកន្លែងទំនេរឱ្យកីឡាករ Foden និង Saka នៅផ្នែកឆ្វេងស្ដាំ៕
