រុស្ស៊ីសំដែងការព្រួយបារម្ភគួរឲ្យកត់សម្គាល់ជុំវិញសុវត្ថិភាពតំបន់គ្រីមៀរ បន្ទាប់ពីអ៊ុយក្រែននៅរយៈពេលចុងក្រោយនេះហាក់ដូចជាបង្កើនការវាយប្រហារចូលជ្រៅដីរុស្ស៊ី។
ទោះបីជាមិនមានការផ្ទៀងផ្ទាត់ច្បាស់លាស់ថាអ៊ុយក្រែនជាអ្នកវាយប្រហារមូលដ្ឋានទ័ពអាកាសរុស្ស៊ីនៅសប្តាហ៍នេះក៏ដោយ ប៉ុន្តែខាងក្រសួងការពារជាតិរុស្ស៊ីបានចាត់ទុករួចហើយថាជាការបង្កហេតុភេរវកម្មរបស់របបទីក្រុងគៀវ។ វិមានក្រឹមឡាំងកាលពីថ្ងៃព្រហស្បតិ៍ទី ៨ ខែធ្នូ បានសំដែងការព្រួយបារម្ភគួរឲ្យកត់សម្គាល់ទៅកាន់អ្នកសារព័ត៌មានអំពីសុវត្ថិភាពតំបន់គ្រីមៀរ ភ័យខ្លាចអ៊ុយក្រែននឹងបើកការវាយប្រហារចលាចលនៅគ្រីមៀរ។ អ្នកនាំពាក្យវិមានក្រឹមឡាំង លោក Dmitry Peskov បានមានប្រសាសន៍ថា “ពិតជាមានហានិភ័យ ដោយសារតែភាគីអ៊ុយក្រែនបន្តគោលនយោបាយរបស់ពួកគេក្នុងការរៀបចំការវាយប្រហារភេរវកម្ម”។ “ប៉ុន្តែយ៉ាងណាមិញ ព័ត៌មានដែលយើងទទួលបាន គឺថារដ្ឋបាលបានកំពុងចាត់វិធានការប្រឆាំងដ៏មានប្រសិទ្ធភាពហើយ”។
សូមរំលឹកថា ការវាយប្រហារដោយយន្តហោះគ្មានមនុស្សបើកចុងក្រោយទៅលើមូលដ្ឋានទ័ពអាកាសរុស្ស៊ីសម្លាប់មនុស្ស៣នាក់ បានកើតឡើងបន្ទាប់ពីប្រធានាធិបតីរុស្ស៊ី លោក វ្ល៉ាឌីមៀរ ពូទីន បានទៅត្រួតពិនិត្យស្ពានតភ្ជាប់នៅតំបន់គ្រីមៀរ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
