អ្នកបើកយន្តហោះចម្បាំងអ៊ុយក្រែន លោក Vadym Voroshylov បានទទួលងារជាវីរបុរសពីលោកហ្សេឡិនស្គី ក្រោយហ៊ានប្រថុយជីវិតបាញ់ទម្លាក់យន្តហោះគ្មានមនុស្សសត្រូវ៥គ្រឿង និងមីស៊ីល២គ្រាប់។
![](https://cambodiaflashnews.com/wp-content/uploads/2021/06/top-banner.gif)
យោងតាមកាសែតជាតិអ៊ុយក្រែនប្រាវដា អ្នកបើកយន្ដហោះខាងលើបានទទួលជោគជ័យពិតប្រាកដមែនក្នុងការបំពេញកាតព្វកិច្ចបាញ់ទម្លាក់យន្តហោះគ្មានមនុស្សបើកផលិតដោយអ៊ីរ៉ង់ បញ្ជាដោយរុស្ស៊ីចំនួន៥គ្រឿង ព្រមទាំងមីស៊ីលចំនួន២គ្រាប់បន្ថែមទៀតនៅតំបន់ Vinnytsia ភាគកណ្តាលអ៊ុយក្រែន។ រូបភាពដែល Vadym Voroshylov រូបនេះបានថត ក្នុងស្ថានភាពរបួសក្បាល មុខប្រឡាក់សុទ្ធតែឈាម គឺបានទទួលការកោតសរសើរយ៉ាងខ្លាំងពីសំណាក់អ្នកលេងសង្គមពិភពលោក ជនរួមជាតិអ៊ុយក្រែន ពិសេសបានទទួលការផ្តល់ងារជាវីរបុរសយោធាខ្ពស់បំផុតរបស់អ៊ុយក្រែនពីប្រធានាធិបតីហ្សេឡិនស្គីទៀតផង។
យោងតាមប្រភពដដែល រូបខាងលើត្រូវបានថតភ្លាមៗ ក្រោយ Vadym Voroshylov បានលោតចេញពីយន្តហោះចម្បាំង MiG-29 របស់លោក ក្រោយបុកផ្ទុះនឹងយន្តហោះគ្មានមនុស្សបើក។ ទោះបីជាលោក Vadym ធ្លាប់បានរិះគន់ទៅលើវិស័យកងអាកាសអ៊ុយក្រែនដោយសារប្រាក់ខែទាប យន្តហោះចាស់ៗក៏ដោយ តែលោកនៅតែបានប្តេជ្ញាចិត្តជាតិនិយមទប់ទល់នឹងការឈ្លានពានរបស់រុស្ស៊ី៕
ប្រភព៖ Pravda
ប្រភពរូប៖Pravda
ប្រែសម្រួល៖សុខ តុលា