កីឡាករ Son Heung-min កាលពីថ្ងៃអង្គារ បានធ្វើការសុំទោស បន្ទាប់ពីក្រុមជម្រើសជាតិកូរ៉េខាងត្បូង (កូរ៉េ) របស់គេ បានធ្លាក់ចេញពីព្រឹត្តិការណ៍ World Cup ក្នុងវគ្គ ១៦ក្រុមចុងក្រោយ នៅប្រទេសកាតា ដោយរងបរាជ័យយ៉ាងដំណំ ៤-១ ក្រោមថ្វីជើងរបស់ក្រុមប្រេស៊ីល ។
![](https://cambodiaflashnews.com/wp-content/uploads/2021/06/top-banner.gif)
ប្រធានក្រុម និងកីឡាករឆ្នើមផ្សេងទៀត ហាក់គ្មានថាមពលទាល់តែសោះ ខណៈក្រុមប្រេស៊ីលស៊ុតបញ្ចូលទីបានដល់ទៅ ៤គ្រាប់ ក្នុងវគ្គទី១ ក្នុងការប្រកួត កាលពីថ្ងៃចន្ទ មុនពេលកីឡាករ Paik Seung-ho រកបាន ១គ្រាប់លួងចិត្តវិញ នៅនាទីទី៧៦ សម្រាប់កីឡាករកូរ៉េ ដែលចាញ់ប្រៀបទាំងស្រុង។ ក្រុមកូរ៉េ នៅតែមិនធ្លាប់បានឈ្នះការប្រកួត ក្នុងវគ្គចាញ់ធ្លាក់ នៅ World Cup ក្រៅទឹកដីរបស់ខ្លួននោះឡើយ។
ខ្សែប្រយុទ្ធវ័យ ៣០ឆ្នាំរបស់ក្រុម Tottenham ដែលបានលេងដោយមានរបាំងការពារមុខ នៅប្រទេសកាតានេះ បន្ទាប់ពីទទួលការវះកាត់ផ្ទៃមុខ កាលពីខែមុន បាននិយាយថា៖ «ខ្ញុំអាចត្រឹមតែនិយាយសុំទោសអ្នកគាំទ្ររបស់យើង ចំពោះការសម្រេចមិនបានដូចការរំពឹងទុករបស់ពួកគេ»។
រូបគេបានប្រាប់អ្នកយកព័ត៌មានទូរទស្សន៍ថា៖ «យើងបានប្រឹងប្រែងអស់ពីសមត្ថភាពហើយ ប៉ុន្តែខ្ញុំគិតថា យើងកំពុងតែលេងហ្គេមដ៏លំបាកមួយ។ យ៉ាងណាក្ដី វាមិនមានការសង្ស័យនោះទេថា កីឡាករទាំងអស់ បានប្រឹងប្រយុទ្ធដោយមោទនភាព លះបង់ និងប្រឹងប្រែងយ៉ាងខ្លាំង ដើម្បីឱ្យបានមកដល់ចំណុចនេះ។ កីឡាករ និងបុគ្គលិកពិតជាបានប្រឹងប្រែងអស់ពីសមត្ថភាព ដើម្បីត្រៀមខ្លួន សម្រាប់ការប្រកួតនេះ ដូច្នេះខ្ញុំសង្ឃឹមថា អ្នកទាំងអស់គ្នាយល់»។
គ្រូបង្វឹករបស់ក្រុមកូរ៉េខាងត្បូង លោក Paulo Bento បានប្រកាសភ្លាមៗ បន្ទាប់ពីការរងបរាជ័យយ៉ាងដំណំនេះថា គាត់នឹងមិនបន្តស្នាក់នៅទៀតទេ ដោយគាត់ប្រាប់ថា នេះជាការសម្រេចចិត្ត ត្រូវបានធ្វើឡើង តាំងពីខែកញ្ញា។ អតីតកីឡាកររបស់ក្រុមជម្រើសជាតិព័រទុយហ្គាល់វ័យ ៥៣ឆ្នាំរូបនេះ បានចូលមកកាន់តំណែង ក្នុងឆ្នាំ២០១៨៕