កីឡាករ Goncalo Ramos បាននិយាយថា រូបគេមិនធ្លាប់សូម្បីតែស្រមៃដល់ការបានបង្ហាញខ្លួនជម្រើសដំបូង ក្នុងការប្រកួតវគ្គចាញ់ធ្លាក់ នៅឯព្រឹត្តិការណ៍ World Cup នោះទេ កុំថាឡើយដល់ទៅការធ្វើបានហ៊ែតទ្រិក (ស៊ុត ៣គ្រាប់) ពីការបានលេងជម្រើសដំបូងរបស់ខ្លួន ក្នុងការប្រកួត ដែលឃើញថា ក្រុមព័រទុយហ្គាល់លត់ក្រុមស្វីសដល់ទៅ ៦-១។
![](https://cambodiaflashnews.com/wp-content/uploads/2021/06/top-banner.gif)
ខ្សែប្រយុទ្ធវ័យ ២១ឆ្នាំ ត្រូវបានផ្តល់ឱកាសឱ្យលេង ក្នុងជម្រើស ១១នាក់ដំបូងដ៏គួរឱ្យភ្ញាក់ផ្អើលមុនកីឡាករ Cristiano Ronaldo ដែលជាម្ចាស់ជយលាភីពានរង្វនា់ Ballon d’Or ៥ សម័យកាល ហើយបានផ្តល់ការតបស្នងដល់គ្រូបង្វឹក លោក Fernando Santos ជាមួយនឹងការបង្ហាញនូវទម្រង់លេង ដែលនាំឱ្យមានជ័យជម្នះយ៉ាងត្រចះត្រចង់។
កីឡាករ Ramos បាននិយាយថា៖ «សូម្បីតែនៅក្នុងសុបិនដ៏ធំបំផុតរបស់ខ្ញុំ ក៏ខ្ញុំមិនគិតពីការបានចូលលេងជម្រើសដំបូង ក្នុងវគ្គចាញ់ធ្លាក់ នៅ World Cup និងការស៊ុតបញ្ចូលទីបាន ៣គ្រាប់នោះឡើយ។ ប៉ុន្តែយើងត្រូវតែគិតពី ១ហ្គេម ទៅ ១ហ្គេម ហើយត្រៀមខ្លួន សម្រាប់ការប្រកួតបន្ទាប់ (វគ្គពាក់កណ្តាលផ្តាច់ព្រ័ត្រជាមួយក្រុមម៉ារ៉ុក)។ លទ្ធផលពេលនេះ មិនសំខាន់ទេ។ យើងនឹងប្រឹងប្រែងឱ្យអស់ពីលទ្ធភាព នៅការប្រកួតបន្ទាប់»។
កីឡាករ Ramos មានអាយុត្រឹមតែ ២ឆ្នាំប៉ុណ្ណោះ នៅពេលដែលកីឡាករ Ronaldo បានបង្ហាញខ្លួនជាលើកដំបូង សម្រាប់ក្រុមជម្រើសជាតិព័រទុយហ្គាល់ ហើយជារឿយៗ រូបគេតែងបាននិយាយកោតសរសើរ ចំពោះកីឡាករវ័យ ៣៧ឆ្នាំ។
កីឡាករល្អប្រចាំការប្រកួត នៅកីឡដ្ឋាន Lusail ត្រូវបានសួរថា តើបន្ទប់ផ្លាស់សម្លៀកបំពាក់ និងកីឡាករ Ronaldo មានប្រតិកម្មយ៉ាងណា ចំពោះការជ្រើសរើសក្រុមដ៏គួរឱ្យភ្ញាក់ផ្អើលពី លោក Santos។
«និយាយដោយស្មោះត្រង់ គ្មាននរណាម្នាក់ ក្នុងក្រុម និយាយពីរឿងនេះទេ។ កីឡាករ Cristiano (Ronaldo) ក្នុងនាមជាប្រធានក្រុម គាត់បានធ្វើអ្វី ដែលគាត់ត្រូវធ្វើ គាត់បានជួយ គាត់បាននិយាយជាមួយយើង មិនត្រឹមតែខ្ញុំផ្ទាល់ប៉ុណ្ណោះទេ ប៉ុន្តែចំពោះមិត្តរួមក្រុមរបស់ខ្ញុំទាំងអស់»។ នេះជាការឆ្លើយតបរបស់កីឡាករ Ramos៕