បាត់ដំបង៖ អាជ្ញាធរខេត្តបាត់ដំបង និង ខេត្តត្រាត បានសម្រេចរួមគ្នាបើកច្រកទ្វាតំបន់ព្រំដែន ៤០០ ក្នុងស្រុកសំឡូត ដាក់ដំណើរការឡើងវិញបន្ទាប់ពីបិទខ្ទប់ដោយសារការរីករាលដាល នៃជំងឺកូវីដ-១៩។
យោងតាមលិខិតប្រកាសផ្លូវការរបស់រដ្ឋបាលខេត្តបាត់ដំបងបានបង្ហាញឲ្យដឹងថា៖ ដោយពិនិត្យឃើញថាចំនួនអ្នកឆ្លងជំងឺកូវីដ-១៩នា ពេលបច្ចុប្បន្នមានការថយចុះនិងគ្រប់យ៉ាងមានដំណើការល្អប្រសើរឡើងវិញជាបន្តបន្ទាប់ហើយប្រជាពលរដ្ឋទទួលបានការចាក់វ៉ាក់ សាំងការពារជំងឺកូវីដ-១៩ បានយ៉ាងពេញលេញ និងមានប្រសិទ្ធភាពម្យ៉ាងទៀតដើម្បីបន្តពង្រឹងកិច្ចសហប្រតិបត្តិការរវាងអាជ្ញាធរ ខេត្តជាប់ព្រំដែន ( ខេត្តបាត់ដំបង – ខេត្តត្រាត ) មានទំនាក់ទំនង និងកិច្ចសហការយូរអង្វែងបន្ថែមទៀត ទើបរដ្ឋបាលខេត្តជាប់ព្រំប្រទល់គ្នាពិសេសក្នុងនាមជាប្រទេសជិតខាងទាំងពីរបានសម្រេចពិភាក្សាបើកជាផ្លូវការឡើងវិញ គោលបំណងបង្កលក្ខណៈងាយស្រួលដល់ប្រជាពលរដ្ឋជាកសិករនៃខេត្តទាំងពីរមានឱកាសដោះដូរផលិតផល ទំនិញ ឬពលរដ្ឋអ្នកទេសចរណ៍ឆ្លងកាត់ដើរលេងកម្សាន្តទៅវិញ ទៅមក។
ប្រភពដដែលបានបញ្ជាក់ដែរថា÷ ការឯកភាពគ្នារវាងខេត្តជាប់ព្រំដែន ខេត្តបាត់ដំបង-ខេត្តត្រាត នេះចាប់ដំណើការដូចធម្មតាឡើង វិញចាប់ពីថ្ងៃប្រកាសជូនដំណឹងតទៅចាប់ពីថ្ងៃទី ០៥ ខែវិច្ឆិកា ឆ្នាំ ២០២២កន្លងមកថ្មីៗនេះ។ច្រកទ្វាតំបន់ព្រំដែន៤០០មានទីតាំងឋិតនៅ ក្នុង ស្រុកសំឡូត ខេត្តបាត់ដំបង និងតំបន់ឈមគ្នាជាមួយភាគីប្រទេសថៃ ក្នុងភូមិសាស្ត្រតំបន់ បានម៉ាក់មួង ស្រុកបររ៉ៃ ខេត្តត្រាត៕ដោយ: ព្រះអង្គខ្មៅ
