ភ្នំពេញ៖សមត្ថកិច្ចខណ្ឌពោធិ៍សែនជ័យ បានបង្ក្រាបទីតាំងរបស់ជនជាតិចិនដែលបើកលេងល្បែងស៊ីសងខុសច្បាប់ និងដកហូតសម្ភារពាក់ព័ន្ធបទល្មើសមួយចំនួន។
មន្ត្រីចុះអនុវត្តបានឱ្យដឹងថា កម្លាំងគណៈបញ្ជាការឯកភាពខណ្ឌពោធិ៍សែនជ័យ បានចុះបង្ក្រាបទីតាំងល្បែងស៊ីសងរបស់ជនជាតិចិនមួយកន្លែងនិងដកហូតសម្ភារពាក់ព័ន្ធបទល្មើសមួយចំនួននៅម្តុំហាងយីហោ ជិងសៀកឡាយ ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ កាលពីរសៀលថ្ងៃទី៦ ខែធ្នូ ឆ្នាំ២០២២។
មុនបង្ក្រាប ពលរដ្ឋបានរាយការណ៍ដោយសម្ងាត់ថា ទីតាំងខាងលើត្រូវបានជនជាតិចិនជួលសម្រាប់បើកកាស៊ីណូលេងល្បែងស៊ីសងជាច្រើនប្រភេទនិងមានភ្ញៀវជាជនជាតិចិនដូចគ្នាចូលលេងជារៀងរាល់ថ្ងៃ។បន្ទាប់មកកម្លាំងបានចុះពិនិត្យជាក់ស្តែង ឃើញទីតាំងខាងលើបាន បើកល្បែងស៊ីសងខុសច្បាប់ពិតប្រាកដមែន។តែពេលកម្លាំងចុះប្រតិបត្តិការមិនមានជនប្រព្រឹត្តបទល្មើសនៅទីនោះទេ
សមត្ថកិច្ចបង្ក្រាបនិងដកហូតសម្ភារមួយចំនួន ហើយបានបិទទីតាំងខាងលើជាបណ្តោះអាសន្ន៕ដោយ៖វិចិត្រ