អ្នកចាំទី Dominik Livakovic បាននិយាយថា រូបគេកំពុងបន្តរក្សាប្រពៃណីរបស់ក្រូអាស៊ី បន្ទាប់ពីភាពជាវីរបុរសរបស់រូបគេ ក្នុងវគ្គនៃការស៊ុតបាល់ប៉េណាល់ទីកាត់ក្ដីទល់នឹងក្រុមជប៉ុន កាលពីថ្ងៃចន្ទ ធ្វើឱ្យក្រុមជម្រើសជាតិរបស់គេ បានឆ្លងទៅវគ្គ ១/៤ ផ្តាច់ព្រ័ត្រនៃព្រឹត្តិការណ៍ World Cup។
អ្នកចាំទី Livakovic បានសង្គ្រោះបាល់ចំនួន ៣គ្រាប់ ដែលស៊ុតដោយកីឡាកររបស់ក្រុមជប៉ុន បន្ទាប់ពីការប្រកួតទាំងក្នុងម៉ោងធម្មតា និងម៉ោងបន្ថែមពិសេសស្មើគ្នា ១-១ ខណៈដែលលទ្ធផលបរាជ័យ ៣-១ ក្នុងវគ្គប៉េណាល់ទីកាត់ក្ដីនេះ បានបញ្ចប់ដំណើរផ្សងព្រេងរបស់ក្រុមសាម៉ូរ៉ៃជប៉ុន ក្នុងប្រទេសកាតា ហើយក្រុមក្រូអាស៊ី ត្រូវធ្វើដំណើរទៅជួបប្រេស៊ីល ក្នុងវគ្គ ៨ក្រុមចុងក្រោយ។
ក្រុមក្រូអាស៊ីបានឈ្នះការស៊ុតបាល់ប៉េណាល់ទីកាត់ក្ដីនេះចំនួន ២ដង អំឡុងការធ្វើដំណើររបស់ពួកគេ រហូតវគ្គផ្តាច់ព្រ័ត្រ កាលពីឆ្នាំ២០១៨ ហើយសម្រេចបានម្តងទៀត សម្រាប់ការប្រកួតប្រជែង ក្នុងកីឡដ្ឋាន Al Janoub នាប្រទេសកាតា ឆ្នាំ២០២២ នេះ។
កីឡាករ Livakovic បានប្រាប់អ្នកសារព័ត៌មានថា៖ «ខ្ញុំបានបន្តប្រពៃណីពីអ្នកធ្វើតួនាទីនេះមុនខ្ញុំ (អ្នកចាំទី Danijel Subasic)។ ខ្ញុំគិតថា វាជាសភាវគតិជាងការវិភាគណាមួយ ចំពោះអ្នកទាត់ ដែលយើងត្រូវប្រឈមមុខជាមួយ។ ខ្ញុំមិនគិតថា នោះជាការទាត់បាល់ពិន័យដ៏ពិបាក ក្នុងការសង្គ្រោះនោះទេ វាមិនមែនជាការទាត់បាល់ពិន័យដ៏ល្អឥតខ្ចោះនោះឡើយ»។
រូបគេបានបន្ថែមថា៖ «សូមអរព្រះគុណដល់ព្រះជាម្ចាស់ សម្រាប់លទ្ធផលនោះ។ វាជាអារម្មណ៍ដ៏អស្ចារ្យណាស់។ អរគុណព្រះជាម្ចាស់ ដែលបានបញ្ចប់ដោយល្អ។ នេះគឺជាពេលវេលាដ៏គួរឱ្យពេញចិត្តបំផុត ក្នុងអាជីពរបស់ខ្ញុំ»។
ជាមួយគ្នានេះ គ្រូបង្វឹករបស់ក្រុមជប៉ុន លោ Hajime Moriyasu ក៏បានពោលសរសើរកីឡាករ Livakovic ដែរ សម្រាប់ការបង្ហាញនូវទម្រង់លេងរបស់គេ ដោយលោកផ្តោតលើការសង្គ្រោះបាល់យ៉ាងអស្ចារ្យ ជាជាងសម្លឹងដល់ការស៊ុតបាល់ប៉េណាល់ទីមិនសូវល្អ ដែលធ្វើឡើងដោយកីឡាករ Takumi Minamino, Kaoru Mitoma និង Maya Yoshida។
លោក Moriyasu បានប្រាប់ថា៖ «ខ្ញុំមិនគិតថា យើងចុះញ៉មជាមួយនឹងសម្ពាធនោះទេ ខ្ញុំគិតថាអ្នកចាំទី គឺអស្ចារ្យណាស់។ កីឡាកររបស់ជប៉ុនលេង ១២០នាទី ដោយក្លៀវក្លាបំផុត ហើយកីឡាករ ដែលទទួលភារៈទាត់បាល់ប៉េណាល់ទីនោះ ក៏មានភាពក្លាហានផងដែរ»៕
