FIFA (សហព័ន្ធបាល់ទាត់អន្តរជាតិ) បានឱ្យដឹង កាលពីថ្ងៃចន្ទថា ស្ថាប័នបានបើកដំណើរការនីតិវិធីផ្នែកវិន័យប្រឆាំងនឹងសហព័ន្ធបាល់ទាត់ស៊ែប៊ី បន្ទាប់ពីក្រុមជម្រើសជាតិមួយនេះ គ្រប់គ្រងអារម្មណ៍មិនបាន រហូតមានជម្លោះជាមួយក្រុមស្វីស អំឡុងការប្រកួត ក្នុងព្រឹត្តិការណ៍ World Cup។
ស្ថាប័នគ្រប់គ្រងកីឡាបាល់ទាត់ពិភពលោកមួយនេះ បាននិយាយថា ខ្លួនកំពុងពិនិត្យមើលដល់ការបំពានមួយចំនួនដល់បទបញ្ញត្តិរបស់ស្ថាប័ន ក្នុងនោះមានរួមទាំងការប្រព្រឹត្តអាកប្បកិរិយាមិនសមរម្យរបស់កីឡាករ និងមន្ត្រី ហើយនិងការរើសអើងជាដើម។
FIFA បាននិយាយសំដៅទៅដល់ហេតុការណ៍ អំឡុងការប្រកួតវគ្គចែកពូល ឬវគ្គសន្សំពិន្ទុក្នុងពូល ដោយមិនបាននិយាយថា នោះជាអ្វីឡើយ។ អ្នកគាំទ្រ ក្នុងហ្គេម កាលពីថ្ងៃសុក្រ នាប្រទេសកាតា ដែលក្រុមស្វីសមានជ័យជម្នះ ៣-២ ដើម្បីបានឡើងទៅវគ្គបន្តនោះ ត្រូវបានប្រាប់ឱ្យបញ្ឈប់ការស្រែកច្រៀង និងធ្វើកាយវិការរើសអើងគ្រប់យ៉ាង។
ភ្លាមៗនោះ គេមិនច្បាស់ទេថា តើអ្វីជាមូលហេតុនៃការប្រកាសនោះទេ ប៉ុន្តែវាត្រូវបានធ្វើឡើងបន្ទាប់ពីការប្រឈមមុខគ្នា រវាងប្រធានក្រុមស្វីសកីឡាករ Granit Xhaka និងកីឡាកររបស់ក្រុមស៊ែប៊ី។ ចំណុចកើតបញ្ហា នៅវគ្គទី២ បានពាក់ព័ន្ធនឹងខ្សែប្រយុទ្ធ Breel Embolo របស់ក្រុមស្វីស និងកីឡាករបម្រុងរបស់ក្រុមស៊ែប៊ីបានរត់ចូលទីលាន នៅឯកីឡដ្ឋាន 974 ដើម្បីមកប្រកែកតវ៉ាជជាមួយកីឡាករស្វីស មុនពេលដែលអាជ្ញាកណ្តាល អាចគ្រប់គ្រងស្ថានការណ៍បាន។
សម្រាប់កីឡាករ Xhaka រូបគេមកពីគ្រួសារមួយ ដែលមានដើមកំណើតនៅប្រទេសកូសូវ៉ូ ជាអតីតខេត្តរបស់ស៊ែប៊ី ដែលមានប្រជាជនភាគច្រើនជាជនជាតិអាល់បានី។ នៅមុននេះ ក្រុមស៊ែប៊ីត្រូវបាន FIFA ស៊ើបអង្កេតរួចហើយ បន្ទាប់ពីក្រុមនេះបានព្យួរទង់ជាតិដ៏ចម្រូងចម្រាស ក្នុងបន្ទប់ផ្លាស់ប្តូររបស់ពួកគេ មុនពេលពួកគេចាញ់ប្រេស៊ីល នៅកាតា។
សហព័ន្ធកីឡាបាល់ទាត់កូសូវ៉ូ បានដាក់ពាក្យបណ្តឹងទៅ FIFA បន្ទាប់ពីរូបថតជាច្រើន បានបង្ហាញពីរចនាប័ទ្មនៃទង់ជាតិរបស់ស៊ែប៊ី ជាមួយនឹងផែនទី ដែលពណ៌នាកូសូវ៉ូថា ជាផ្នែកមួយនៃប្រទេស និងរួមបញ្ចូលពាក្យស្លោក «នឹងគ្មានការចុះញ៉មជាដាច់ខាត»៕
