លោក Paulo Bento បានប្រកាសថា គាត់នឹងមិនបន្តធ្វើជាគ្រូបង្វឹករបស់ក្រុមជម្រើសជាតិកូរ៉េខាងត្បូង (កូរ៉េ) ទៀតទេ បន្ទាប់ពីក្រុមយក្សរបស់អាស៊ីមួយនេះ បានធ្លាក់ចេញពីការប្រកួតប្រជែង ក្នុងព្រឹត្តិការណ៍ World Cup ជាមួយនឹងបរាជ័យ ៤-១ ក្រោមស្នាដៃរបស់ក្រុមប្រេស៊ីល កាលពីថ្ងៃចន្ទ។
![](https://cambodiaflashnews.com/wp-content/uploads/2021/06/top-banner.gif)
អតីតគ្រូបង្វឹកក្រុមព័រទុយហ្គាល់វ័យ ៥៣ឆ្នាំរូបនេះ បាននិយាយបន្ទាប់ពីប្រកួតចាញ់ ក្នុងវគ្គ ១៦ក្រុមចុងក្រោយថា៖ «ឥឡូវនេះ ខ្ញុំត្រូវគិតពីអនាគត ប៉ុន្តែខ្ញុំនឹងមិនបន្តនៅជាមួយក្រុមកូរ៉េទៀតទេ។ ខ្ញុំទើបតែបានប្រាប់កីឡាករ និងប្រធានសហព័ន្ធបាល់ទាត់ជាតិ»។
«នេះគឺជាការសម្រេចចិត្ត ដែលខ្ញុំបានធ្វើ កាលពីខែកញ្ញា។ វាត្រូវបានកំណត់យ៉ាងច្បាស់លាស់ ហើយថ្ងៃនេះ ខ្ញុំបញ្ជាក់វាម្ដងទៀត។ ខ្ញុំត្រូវតែអរគុណពួកគេ (កីឡាករ) ហើយមានមោទនភាពយ៉ាងខ្លាំង ដែលបានធ្វើជាអ្នកគ្រប់គ្រងរបស់ពួកគេ»។ លោក Bento បានបន្ថែម។
លោក Bento បានចូលកាន់មកតំណែង បន្ទាប់ពីការប្រកួត World Cup 2018 ដោយបន្តពីលោក Shin Tae-yong។ នៅប្រទេសកាតា លោកបានដឹកនាំក្រុមកូរ៉េខាងត្បូងឱ្យឡើងផុតពីវគ្គចែកពូលជាលើកដំបូង គិតចាប់តាំងពីឆ្នាំ២០១០ ជាមួយនឹងជ័យជម្នះដង្ហើមចុងក្រោយលើក្រុមព័រទុយហ្គាល់ សម្រាប់ការប្រកួតចុងក្រោយ ក្នុងពូលរបស់ពួកគេ។
យ៉ាងណាក៏ដោយ ពួកគេត្រូវតាមពីក្រោយក្រុមប្រេស៊ីលដល់ទៅ ៤គ្រាប់ តាំងពីវគ្គទី ១ ក្នុងហ្គេម កាលពីយប់ថ្ងៃចន្ទនោះ មុននឹងអាចតបតបាន ១គ្រាប់វិញ ក្នុងវគ្គទី២ សម្រាប់ការប្រកួត ក្នុងកីឡដ្ឋាន 974 នាទីក្រុងដូហានេះ។
តែលោក Bento ដែលបានធ្វើជាអ្នកចាត់ការក្រុមជម្រើសជាតិនៃប្រទេសកំណើតរបស់ខ្លួន នៅឯព្រឹត្តិការណ៍ដ៏ធំនេះ ក្នុងឆ្នាំ២០១៤ នាប្រទេសប្រេស៊ីល បានប្រាប់ថា៖ «ខ្ញុំជឿថា យើងអាចមានមោទនភាពយ៉ាងខ្លាំង ចំពោះអ្វីដែលយើងសម្រេចបាន នៅ World Cup នេះ និងអ្វីដែលយើងបានធ្វើ ក្នុងរយៈពេល ៤ឆ្នាំចុងក្រោយនេះ ដើម្បីបានធ្វើដំណើរមកទីនេះ»៕