រុស្ស៊ីរាយការណ៍ថា យន្តហោះគ្មានមនុស្សបើករបស់អ៊ុយក្រែនបានសម្រុកវាយប្រហារចូលជ្រៅមូលដ្ឋានទ័ពអាកាសក្នុងប្រទេសរុស្ស៊ី ដោយបានសម្លាប់មនុស្សចំនួន៣នាក់។
យោងតាមទីភ្នាក់ងារសារព័ត៌មាន RIA របស់រុស្ស៊ី ការស្លាប់ទាំងបីនាក់នេះបានកើតឡើងនៅឯមូលដ្ឋានទ័ពអាកាសក្នុងទីក្រុង Ryazan ចម្ងាយ ១៨៥ គីឡូម៉ែត្រ ភាគអាគ្នេយ៍នៃទីក្រុងមូស្គូកាលពីថ្ងៃចន្ទទី ៥ ខែធ្នូ ឆ្នាំ២០២២។ ក្នុងការវាយប្រហារចូលជ្រៅក្នុងដីរុស្ស៊ីនេះ ក្រសួងការពារជាតិរុស្ស៊ីបានលើកឡើងថា “របបក្រុងKyiv ដើម្បីតែចង់បំផ្លាញយន្តហោះរយៈចម្ងាយឆ្ងាយរបស់រុស្ស៊ី បានព្យាយាមវាយប្រហារជាមួយយន្តហោះគ្មានមនុស្សបើកដែលផលិតដោយសូវៀតនៅឯអាកាសយានដ្ឋានយោធា Dyagilevo ក្នុងតំបន់ Ryazan និងមូលដ្ឋាន Engels ក្នុងតំបន់ Saratov”។ “យន្តហោះគ្មានមនុស្សបើកបានហោះហើរក្នុងរយៈកម្ពស់ទាប ជាការឆ្លើយតប ប្រព័ន្ធការពារដែនអាកាសរុស្ស៊ីបានបាញ់ទម្លាក់”។ ក្រសួងបន្តថា ក្រៅពីស្លាប់ ក៏មានអ្នករបួស៤នាក់ទៀតផងដែរ ព្រមទាំងខូចខាតយន្តហោះនៅមូលដ្ឋានបន្តិចបន្តួច។
ចំពោះព័ត៌មាននេះ អ៊ុយក្រែនមិនបានអះអាងទទួលខុសត្រូវដោយផ្ទាល់ទេ។ ប្រសិនបើត្រូវបានផ្ទៀងផ្ទាត់ពិតមែន នោះវានឹងក្លាយជាការវាយប្រហារយោធាដ៏ជ្រៅបំផុតដោយអ៊ុយក្រែនក្នុងដីរុស្ស៊ីចាប់តាំងថ្ងៃទី ២៤ ខែកុម្ភៈ។ គួរដឹងថា ប្រទេសរុស្ស៊ីមានយន្តហោះទម្លាក់គ្រាប់បែកយុទ្ធសាស្ត្រពី ៦០ ទៅ ៧០ គ្រឿងដែលមានពីរប្រភេទគឺ Tu-95MS Bear និង Tu-160 Blackjack ។ ទាំងពីរនេះមានសមត្ថភាពអាចផ្ទុកគ្រាប់បែកនុយក្លេអ៊ែរ និងកាំជ្រួចនាវាដែលមានអាវុធនុយក្លេអ៊ែរ៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា
