រដ្ឋាភិបាលសហរដ្ឋអាម៉េរិកបានជាវយន្តហោះទម្លាក់គ្រាប់បែក B-21 ជំនាន់ថ្មីយ៉ាងហោចណាស់ចំនួន ១០០គ្រឿងដាក់ក្នុងវិស័យកងទ័ព ខណៈតម្លៃក្នុងមួយគ្រឿង៧០០លានដុល្លារ។
រដ្ឋមន្ត្រីការពារជាតិអាម៉េរិក លោក Lloyd Austin បាននិយាយនៅក្នុងសេចក្តីថ្លែងការណ៍មួយ កាលពីថ្មីៗនេះថា “យន្តហោះ B-21 Raider គឺជាយន្តហោះទម្លាក់គ្រាប់បែកយុទ្ធសាស្ត្រដំបូងគេ ក្នុងរយៈពេលជាង ៣ ទសវត្សរ៍” ។ “គ្មានយន្តហោះទម្លាក់គ្រាប់បែករយៈចម្ងាយឆ្ងាយណាមួយអាចមក ប្រៀបផ្ទឹមនឹងវាបានទេ”។ លោកបានបន្តថា៖ “ការរីកចម្រើន៥០ឆ្នាំនៃបច្ចេកវិទ្យាអាម៉េរិក គឺអាចសង្កេតបាន និងត្រូវបានលាតត្រដាងក្នុងយន្តហោះនេះ”។ លក្ខណៈដ៏អស្ចារ្យបំផុតស័ក្តិសមនឹងតម្លៃ ៧០០លានដុល្លារ គឺថាសូម្បីតែប្រព័ន្ធការពារដែនអាកាសដ៏ទំនើបបំផុតក្នុងលោក ក៏នឹងពិបាកក្នុងការ តាមរក B-21 ដែរ។
យោងតាមអ្នកនាំពាក្យក្រុមហ៊ុន Northrop Grumman ដែលទទួលផលិតយន្តហោះនេះបាននិយាយថា រដ្ឋាភិបាលបានទិញវា ១០០គ្រឿង ដើម្បីទុកប្រើក្នុងវិស័យទំនើបកម្មកងទ័ព ខណៈយន្តហោះនេះមាន សមត្ថភាពអាចផ្ទុកបន្ទុកនុយក្លេអ៊ែរ ដោយមិនចាំបាច់ត្រូវមាននាវិកបើកវានោះទេ។
គួរសង្កេតថា ការបង្ហាញយន្តហោះទម្លាក់គ្រាប់ថ្មីនេះបានធ្វើឡើងនៅពេលដែលមានភាពតានតឹងភូមិសាស្ត្រនយោបាយរវាងអាម៉េរិក រុស្ស៊ី និងចិន ចំពេលមានសង្រ្គាមនៅអ៊ុយក្រែន និងបូរណភាពទឹកដីតៃវ៉ាន់ផងដែរ។ វាក៏បានកើតឡើងបន្ទាប់ពីរុស្ស៊ី និងចិនបច្ចុប្បន្នកំពុងអភិវឌ្ឍន៍យន្តហោះ ទម្លាក់ គ្រាប់បែកបំបាំងកាយយុទ្ធសាស្ត្រ Xian H-20 និងយន្តហោះទម្លាក់គ្រាប់បែកនុយក្លេអ៊ែររុស្ស៊ី Tupolev PAK DA៕
ប្រភព៖ AFP
ប្រភពរូប៖AFP
ប្រែសម្រួល៖សុខ តុលា
