បាត់ដំបង៖ខ្យងក្រហមបច្ចុប្បន្នកំពុងបង្កការរាតត្បាតយ៉ាងធ្ងន់ធ្ងរលើដំណាំស្រូវរបស់ប្រជាកសិករនៅក្នុងភូមិសាស្ត្រខេត្តបាត់ដំបង។
លោកទុយ អឿត ជាកសិកររស់នៅក្នុងភូមិបឹងរាំង សង្កាត់អូរម៉ាល់ ក្រុងបាត់ដំបង ខេត្តបាត់ដំបង បានឲ្យដឹងនៅថ្ងៃទី ០៥ ខែវិច្ឆិកា ឆ្នាំ២០២២ថា៖ឆ្នាំនេះគ្រួសាររបសលោកបានបង្កបង្កើនផលដំណាំស្រូវលើផ្ទៃដីជិត ១០ហិកតា ក្នុងនោះមានពូជស្រូវម្លិះ និងពូជស្រូវរំដួល។ ទាំងកន្លងមក ក៏ដូចជាចំពោះមុខស្រូវពង្រោះឬសំណាបរបស់លោកមានផលវិបាកយ៉ាងខ្លាំងដោយសារសត្វខ្យងក្រហមស៊ីបំផ្លាញកាត់ដើមអស់ស្ទើរទាំងស្រុងយ៉ាងលឿនត្រឹមរយ:ពេលខ្លី។
ខ្យងក្រហម ពងកូនបានលឿនច្រើនរាប់រយពងក្រហមភ្លឺពេញស្រែបើមិនមានវិធីទប់ស្កាត់ និងបំផ្លាញវាមុននឹងដាំដុះស្រូវទេនោះប៉ុន្តែវិធានការដោយប្រើថ្នាំគីមីបាញ់សម្លាញ់ពូជខ្យងនេះវាបានប៉ះពាល់បំផ្លាញដល់សត្វដែលមានប្រយោជន៍នៅក្នុងស្រែយ៉ាងច្រើនផងដែរមានដូចជា: ពូជខ្យងស្រែ ខ្យងបឹង និងធ្វើឲ្យងាប់ត្រី កង្កែប អន្ទង់ ជន្លេនក្នុងដីព្រមទាំងសត្វដែលមានប្រយោជន៍ផ្សេងៗជាច្រើនប្រភេទទៀត។
លោកទុយ អឿត បាននិយាយថា៖បងប្អូនប្រជាកសិករនៅស្ទើរទូទាំងខេត្តបាត់ដំបងបានជួបនូវបញ្ហាដូចគ្នានេះតួយ៉ាងដូចជានៅក្នុងតំបន់ដែលោករស់នៅបានជួបបញ្ហាប្រឈមនេះយ៉ាងខ្លាំង ពិសេសត្រង់ចំណុចទួលអង្ក្រង ទួលញរ ទួលគុម្ពឬស្សីជាដើម…។
ជុំវិញក្តីកង្វល់របស់កសិករខាងលើ លោក ឈឹម វជិរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបងបានលើកឡើងថា÷បច្ចុប្បន្នការប៉ះពាល់បង្កដោយខ្យងក្រហមនេះស្ទើរតែជាបញ្ហាសកលទៅហើយ។ ក្នុងករណីបងប្អូនប្រជាកសិករបានជួបប្រទះអាចទំនាក់ទំនងមកកាន់មន្ទីរកសិកម្ម ដើម្បីមន្ត្រីជំនាញចុះទៅពន្យល់ណែនាំអំពីវិធីកម្ចាត់បឋមដូចជា: ការដើរប្រមូលដោយដៃ ការដោតឈើ ដោតឬស្សីសម្រាប់ទុកឲ្យខ្យងឡើងពងងាយស្រួលប្រមូលចេញ ឬជីកជារណ្តៅតូចៗរួចដាក់ច្រាំងខ្នុរបន្លែផ្អែមជាដើមដើម្បីឲ្យខ្យងមស៊ីជាចំណីរួចកសិករអាចប្រមូលកៀរយកសត្វខ្យងទាំងអស់នោះទៅបំផ្លាញចោលតែម្តង៕ដោយ: ព្រះអង្គខ្មៅ
