កីឡាករ Robert Lewandowski មិនមានការភ័យខ្លាច ក្នុងការលេង នៅឯព្រឹត្តិការណ៍ World Cup ម្ដងទៀតនោះឡើយ ប៉ុន្តែប្រធានក្រុមជម្រើសជាតិប៉ូឡូញរូបនេះ បានទទួលស្គាល់ថា ក្រុមរបស់គាត់ នឹងត្រូវការផ្លាស់ប្តូរតាក់ទិកជាច្រើនទៀត។
![](https://cambodiaflashnews.com/wp-content/uploads/2021/06/top-banner.gif)
ខ្សែប្រយុទ្ធរូបនេះ បានឃើញក្រុមរបស់ខ្លួនចាញ់ក្រុមបារាំង ៣-១ ក្នុងការប្រកួតវគ្គ ១៦ក្រុមចុងក្រោយ ដោយខ្ទាតចេញពីការប្រកួតប្រជែង នៅប្រទេសកាតា នាឆ្នាំ២០២២ បន្ទាប់ពីមាននូវយុទ្ធនាការដ៏គួរឱ្យខកចិត្ត ដែលបានឃើញថា ពួកគេប្រឹងប្រែងយ៉ាងត្រដាបត្រដួស ក្នុងវគ្គចែកពូលផងដែរ។
ដោយធ្វើដំណើរមកកាន់ព្រឹត្តិការណ៍នេះ ដោយមិនមានគ្រាប់បាល់ស នៅ World Cup ក្នុងអាជីព កីឡាករ Lewandowski បានបន្ថែមគ្រាប់បាល់ទី២ របស់ខ្លួន ក្នុងកម្មវិធីនេះ ដោយការស៊ុតបាល់ប៉េណាល់ទីបានសម្រេច នៅចុងម៉ោង ទល់នឹងក្រុមមាន់គកបារាំង។
ប៉ុន្តែនៅពេលដែលត្រូវបានសួរថា តើរូបគេនឹងនៅតែស្ថិតក្នុងរង្វង់នៃក្រុម ដើម្បីបានបង្ហាញខ្លួន ក្នុងឆ្នាំ២០២៦ ពោលគឺ ៤ឆ្នាំខាងមុខ ដែរ ឬយ៉ាងណា ដោយនៅពេលនោះរូបគេនឹងមានវ័យ ៣៧ឆ្នាំ ខ្សែប្រយុទ្ធចាស់វស្សារបស់ក្លិប Barcelona នឹងមិនមានការប្ដេជ្ញាចិត្ត ១០០ភាគរយនោះទេ។
រូបគេបាននិយាយថា៖ «តាមផ្លូវកាយ ខ្ញុំមិនខ្លាចទេ។ ប៉ុន្តែមានរឿងជាច្រើនដែលត្រូវដោះស្រាយជាមុន។ វាពិបាកក្នុងការនិយាយ នាពេលឥឡូវនេះ។ ខាងកម្លាំងការ វាមិនធ្វើឱ្យខ្ញុំភ័យខ្លាចនោះទេ ប៉ុន្តែនៅតែមានភាពមិនប្រាកដប្រជាជាច្រើនទៀត»។
ជាមួយគ្នានេះដែរ កីឡាករ Lewandowski បានប្រាប់ពីការលេងបែបការពាររបស់ក្រុមប៉ូឡូញនៅកាតានេះថា ប្រហែលជាចាំបាច់ត្រូវផ្លាស់ប្ដូរ។
Lewandowski បាននិយាយថា៖ «វានៅមានដំណើរផ្លូវវែងឆ្ងាយ ហើយពិតណាស់ជាក់ស្តែង យើងត្រូវតែរីករាយនឹងហ្គេមនេះ។ ប្រសិនបើយើងវាយលុក ព្យាយាមវាយលុក វានឹងមានលក្ខណៈខុសគ្នាបន្តិច។ ប៉ុន្តែប្រសិនបើយើងលេងការពារ វាមិនសូវជាមានភាពរីករាយប៉ុន្មាននោះឡើយ»៕