ក្រុមតោកំណាចអង់គ្លេស បានប្រឹងជម្នះលើការចាប់ផ្ដើមដ៏មិនសូវជាលេចធ្លោរបស់ខ្លួន រហូតដណ្ដើមបាននូវជ័យជម្នះយ៉ាងងាយៗ ៣-០ លើក្រុមសេណេហ្គាល់ ក្នុងការប្រកួត កាលពីថ្ងៃអាទិត្យ ខណៈដែលគ្រាប់បាល់ស៊ុតបញ្ចូលទីដោយកីឡាករ Jordan Henderson, Harry Kane និង Bukayo Saka បានជួយឱ្យពួកគេឆ្លងទៅវគ្គ ១/៤ ផ្ដាច់ព្រ័ត្រ ក្នុងព្រឹត្តិការណ៍ World Cup ដោយត្រូវជួបជាមួយនឹងក្រុមម្ចាស់ជើងឯកចាស់បារាំង។
ក្រុមអង់គ្លេសបានចំណាយពេលយ៉ាងយូរ ដើម្បីយកប្រៀបលើក្រុមជើងឯកអាហ្រ្វិក ជាក្រុមដែលពួកគេមិនធ្លាប់ជួបពីមុនមក ហើយបានគេចផុតពីការភ័យខ្លាចមួយចំនួន មុនពេលគ្រាប់បាល់ចំនួន ២គ្រាប់ នៅចុងវគ្គទី ១ បានផ្លាស់ប្តូរអារម្មណ៍ នាពេលរាត្រីនេះ ហើយវាមិនមែនជាការប្រកួតទៀតនោះឡើយ បន្ទាប់ពីការឈប់សម្រាក ១៥នាទី ពោលគឺក្រុមតោកំណាចមានប្រៀបស្ទើរទាំងស្រុង ក្រោយនាំមុខ ៣-០។
ជ័យជម្នះដ៏គួរឱ្យចាប់អារម្មណ៍នេះ បានបន្លាយការមិនស្គាល់ចាញ់សោះរបស់ពួកគេ ក្នុងការលេងទល់នឹងក្រុមអាហ្វ្រិករហូតដល់ ២១ដង ក្នុងនោះរួមទាំងការប្រកួត នៅ World Cup នេះចំនួន ៨ផងដែរ។ ក្រុមម៉ារ៉ុក ដែលត្រូវប៉ះក្រុមអេស្ប៉ាញ នៅថ្ងៃអង្គារ ឥឡូវនេះ ជាក្រុមអាហ្វ្រិកតែ ១គត់ ដែលនៅសល់ក្នុងការប្រកួតប្រជែងនេះ។
អ្នកចាត់ការក្រុមអង់គ្លេស លោក Gareth Southgate បាននិយាយថា៖ «ទម្រង់លេងដ៏រឹងមាំ គឺពិតជាល្អឥតខ្ចោះ។ រាល់ការប្រកួត ដែលយើងលេងជាមួយ មានប្រភេទបញ្ហាប្រឈមផ្សេងៗគ្នា និងតាក់ទិកផ្សេងៗគ្នា ដើម្បីឱ្យយើងដោះស្រាយ។ យើងធ្វើបានយ៉ាងប្រសើរជាបណ្ដើរៗ ហើយកំពុងឆ្លើយតបចំពោះបញ្ហាទាំងនោះ។ គុណភាពនៃការផ្លាស់ទី គឺអស្ចារ្យ ហើយការបញ្ចប់ទី គឺច្បាស់លាស់ណាស់»។
វាគឺជាគ្រាប់ទី ១២ របស់អង់គ្លេស ក្នុងការប្រកួតប្រជែងនេះ ដែលច្រើនជាងក្រុមណាទាំងអស់ នៅប្រទេសកាតា និងជាចំនួនសរុប ដែលស្មើនឹងកំណត់ត្រារបស់ពួកគេ កាលពី ៤ឆ្នាំមុន នៅពេលដែលពួកគេបានធ្វើដំណើររហូតដល់វគ្គពាក់កណ្តាលផ្តាច់ព្រ័ត្រ៕
