រដ្ឋាភិបាលទីក្រុងមូស្គូបានប្រកាសពហិការមិនព្រម ក្រោយប្រទេសអឺរ៉ុបលោកខាងលិចបានបន្ទាបតម្លៃប្រេងរបស់ខ្លួនដល់ចំណុចមិនអាចទទួលយកបាន។
![](https://cambodiaflashnews.com/wp-content/uploads/2021/06/top-banner.gif)
ឧបនាយករដ្ឋមន្ត្រីរុស្ស៊ី លោក Alexander Novak បាននិយាយកាលពីចុងសប្តាហ៍កន្លងទៅនេះថា “រុស្ស៊ីនឹងមិនដំណើរការក្រោមតម្លៃដែលបានកំណត់នោះទេ បើទោះជាក្រុងមូស្គូត្រូវកាត់បន្ថយផលិតកម្មក៏ដោយ”។ “យើងនឹងលក់ប្រេង និងផលិតផលប្រេងទៅឱ្យតែប្រទេសណាដែលនឹងធ្វើការជាមួយយើងក្រោមលក្ខខណ្ឌទីផ្សារប៉ុណ្ណោះ”។ “ឥឡូវនេះយើងកំពុងធ្វើការលើយន្តការ ឆ្លើយតបនឹងការហាមឃាត់ការប្រើប្រាស់ឧបករណ៍កំណត់តម្លៃខ្វះមូលដ្ឋាននេះ ពីព្រោះការជ្រៀតជ្រែកបែបនេះអាចធ្វើឱ្យទីផ្សារមានអស្ថិរភាពបន្ថែមទៀត”។
គួររំលឹកបន្តិចថា កាលពីថ្ងៃសុក្រកន្លងទៅនេះ សហភាពអឺរ៉ុប ក៏ដូចជាប្រទេសG7 បានយល់ព្រមស្រុះគ្នាលើការកំណត់តម្លៃប្រេងរបស់រុស្ស៊ីក្នុងតម្លៃត្រឹម ៦០ដុល្លារក្នុងមួយ បារែល ដែលជាទំហំដ៏តូចមួយប្រៀបនឹងតម្លៃចាស់។ ការកំណត់តម្លៃគឺមានគោលបំណងដើម្បីដាក់ទណ្ឌកម្មរុស្ស៊ីមិនឲ្យរកបានប្រាក់ចំណូលបានច្រើន ចំពេលដែលរុស្ស៊ីកំពុងបង្កសង្រ្គាម និងវិនាសកម្មនៅអ៊ុយក្រែន។
ជុំវិញបញ្ហានេះ វានៅតែមិនទាន់ច្បាស់ថាតើប្រេងរបស់រុស្ស៊ីចំនួនប៉ុន្មានដែលវិធានការដាក់ទណ្ឌកម្មនឹងរងផលប៉ះពាល់ដល់ការផ្គត់ផ្គង់ និងជំរុញឱ្យតម្លៃកើនឡើងជាសកល។ តែយ៉ាងណា អារ៉ាប៊ីសាអូឌីត ដែលជាអ្នកផលិតប្រេងលេខ២របស់ពិភពលោក ទំនងជានឹងនៅតែបន្តទិសដៅផ្គត់ផ្គង់នាំចេញទៅអឺរ៉ុបដូចមុន ក៏ដូចជាទៅកាន់អតិថិជននៅក្នុងប្រទេសឥណ្ឌា ចិន និងតួកគី៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា