ភ្នំពេញ៖អង្គមហាសន្និបាតសមាគមអ្នកអភិវឌ្ឍន៍ដីឡូត៍កម្ពុជា កាលពីល្ងាចថ្ងៃទី៣ខែធ្នូ ឆ្នាំ២០២២បានបោះឆ្នោតគាំទ្រផ្តល់សេចក្តីទុកចិត្តជូនសមាសភាពក្រុមប្រឹក្សាភិបាលថ្មីអាណត្តិទី២ សម្រាប់ឆ្នាំ ២០២៣-២០២៥ និងគាំទ្រលោកឧកញ៉ា ម៉ន សុខា ជាប្រធានដឹកនាំសមាគមសម្រាប់អាណត្តិថ្មីដែលជាអាណត្តិទី២បន្តទៀត។
![](https://cambodiaflashnews.com/wp-content/uploads/2021/06/top-banner.gif)
សមាគមអ្នកអភិវឌ្ឍន៍ដីឡូត៍កម្ពុជា ស.អ.ដ.ក (Cambodian Land Lots Development Association C.L.D.A) បានចុះបញ្ជីនៅក្រសួងមហាផ្ទៃ ជាផ្លូវការនៅថ្ងៃទី ១៧ ខែកក្កដា ឆ្នាំ២០២០ ដែលមានទស្សនៈវិស័យ ចូលរួមដោះស្រាយបញ្ហាប្រឈមនានា នៃវិស័យដីឡូត៍ និងលើកស្ទួយមុខមាត់ កេរ្តិ៍ឈ្មោះល្អ ការទទួលស្គាល់ទូលំទូលាយ និងស្របតាមច្បាប់បញ្ញតិ នៅកម្ពុជា។
ក្រោយប្រកាសជាប់ឆ្នោតជាប្រធានសមាគមអ្នកអភិវឌ្ឍន៍ដីឡូត៍កម្ពុជាជាថ្មីម្តងទៀត លោកឧកញ៉ា ម៉ន សុខា បានថ្លែងប្តេជ្ញាថា៖លោកបានតាំងចិត្តចូលរួមជ្រោមជ្រែងជួយដល់សមាជិកសមាជិកា អ្នករកស៊ីនៅក្នុងវិស័យអចលនទ្រព្យជាពិសេសវិស័យដីឡូត៍ឲ្យទទួលបាននូវភាពរីកចម្រើននិងការទតួលស្គាល់។ជាងនេះទៅទៀតលោកសន្យានឹងខិតខំព្យាយាមអនុវត្តតាមផែនការយុទ្ធសាស្ត្រទាំងប្រាំឲ្យសម្រេចបានលទ្ធផលល្អ ១០០%។
![](https://cambodiaflashnews.com/wp-content/uploads/2022/12/photo_2022-12-05_15-49-21.jpg)
លោកឧកញ៉ា បានបញ្ជាក់ថា៖«អ្នកអភិវឌ្ឍគម្រោងអចលនទ្រព្យទាំងអស់ ត្រូវបំពេញកាតព្វកិច្ច ជូនដល់អតិថិជនឲ្យបានចប់សព្វគ្រប់ តាមផែនការ និងគោលការណ៍កំណត់ផ្តល់ភាពស្របច្បាប់ជូនអ្នកទិញ អនុវត្តតាមច្បាប់បញ្ញតិ បង្កើតទំនុកចិត្តពីសាធារណជន ក្នុងនាមជាអ្នកអភិវឌ្ឍល្អសម្រាប់សង្គមជាតិកម្ពុជា» ។
លោកបានបន្តថា៖ឆ្លងកាត់រយៈពេលជិត៣ឆ្នាំ ជាមួយកិច្ចការសម្រេចបានលទ្ធផលល្អប្រសើរមួយចំនួនធំ ពិសេសការប្រឹក្សាយោបល់ ផ្តល់បច្ចេកទេស ពត៌មាន និងផ្សព្វផ្សាយសម្របសម្រួលកិច្ចការផ្លូវច្បាប់ផងដែរ។ ទន្ទឹមនឹងនេះយើងក៏នៅមានបេសកកម្មជាច្រើនទៀតដែលកំពុងបំពេញដើម្បីវឌ្ឍនភាពនៃវិស័យអចលនទ្រព្យ (ដីឡូត៍) និងសង្គមជាតិទាំងមូល។ ភាពរីកចម្រើន នៃវិស័យអចលនទ្រព្យគឺជាមុខមាត់ប្រទេសដែលបង្ហាញឲ្យឃើញពីកំណើនសេដ្ឋកិច្ច ការអភិវឌ្ឍលើគ្រប់វិស័យ ដែលអ្នកអភិវឌ្ឍគម្រោងអចលនទ្រព្យដើរតួយ៉ាងសំខាន់ក្នុងការរៀបចំហេដ្ឋារចនាសម្ព័ន្ធផ្លូវថ្នល់ សំណង់ បង្កើនធនធានមនុស្ស បង្កើកាតការងារ បង្កើតប្រាក់ចំណូល ទាក់ទាញការវិនិយោគ ព្រមទាំងលើកមុខមាត់និងបង្កើនតម្លអចលនទ្រព្យក្នុងតំបន់ក្នុងនោះយើងសង្កេតឃើញថា មានចំណុចវិជ្ជមាន និងអវិជ្ជមាន ដែលកើនឡើង ពោលគឺមានអ្នកអភិវឌ្ឍល្អគិតពីផលប្រយោជន៍រួម និងអ្នកអភិវឌ្ឍមិនល្អគិតតែពីផលប្រយោជន៍ខ្លួនឯង។
លោកឧកញ៉ា ម៉ន សុខា បាក៏បានលើកឡើងផងដែរថា៖អ្នកអភិវឌ្ឍគម្រោងអចលនទ្រព្យល្អ បានជួយផ្តល់អចលនទ្រព្យល្អសម្រាប់ប្រជាពលរដ្ឋ ,បំពេញតម្រូវការជូនអតិថិជនបានល្អប្រសើរ ផ្តល់ប្លង់កម្មសិទ្ធិត្រឹមត្រូវ ភាពស្របច្បាប់ជូនអតិថិជន ,បង្កើតចរន្តសេដ្ឋកិច្ច លំហូរសាច់ប្រាក់ ,ផ្តល់ចំណូលចូលរដ្ឋ តាមរយៈការបង់ពន្ធ ,ផ្តល់ឱកាសវិនិយោគ សម្រាប់ប្រជាពលរដ្ឋ លើកស្ទួយមុខមាត់ក្នុងតំបន់ដែលគាត់អភិវឌ្ឍ ,ធ្វើឲ្យដីធ្លីឡើងតម្លៃខ្ពស់ ចំណេញដល់ពលរដ្ឋរស់នៅក្នុងតំបន់ និងបង្កើតឱកាសការងារច្រើនផ្នែក ។
លោកឧកញ៉ាបានឱ្យដឹងទៀតថា៖គោលដៅរយៈពេល៣ឆ្នាំ សម្រាប់អាណត្តិទី២ ឆ្នាំ២០២៣-២០២៥គឺត្រូវផ្សព្វផ្សាយធ្វើឲ្យអ្នកអភិវឌ្ឍន៍អចលនទ្រព្យ(ដីឡូត៍)យល់ដឹងពីផ្នែកអភិវឌ្ឍន៍ដីឡូត៍បង្កើនកិច្ចសហប្រតិបត្តិការអោយកាន់តែប្រសើរឡើងរវាងក្រុមហ៊ុនអភិវឌ្ឍន៍ និងភ្នាក់ងារលក់ដីឡូត៍ទូទាំងប្រទេស,បញ្ជ្រាបការលើកកំពស់ក្រមសីលធម៌វិជ្ជាជីវៈភាពច្បាស់លាស់និងការអភិវឌ្ឍន៍យ៉ាងពិតប្រាកដ របស់គម្រោងដីឡូត៍ទាំងអស់ ដើម្បីជាប្រយោជន៍ដល់អ្នកទិញ និងអ្នកវិនិយោគ,ជួយសម្របសម្រួលការពង្រីកអាជីវកម្ម និងទីផ្សារដីឡូត៍នៅកម្ពុជាឲ្យមានវិសាលភាពទូលំទូលាយ ការទទួលស្គាល់ និងស្របតាមច្បាប់បញ្ញតិ រួមចំណែកកិច្ចការងារសង្គម,មនុស្សធម៌និងអភិវឌ្ឍន៍ប្រទេសជាតិជាមួយរាជរដ្ឋាភិបាលកម្ពុជា។
លោកឧកញ៉ា ម៉ន សុខា បានគូសបញ្ជាក់ថា៖កត្តាចាំបាច់គឺចង់ជំរុញឲ្យអ្នកវិនិយោគ អ្នកអភិវឌ្ឍន៍អចលនទ្រព្យ ជាពិសេសអ្នកអភិវឌ្ឍន៍ដីឡូតអនុវត្តទៅតាមច្បាប់បទដ្ឋានបច្ចេកទេសឲ្យបានល្អប្រសើរតាមស្តង់ដារកំណត់ដោយរាជរដ្ឋាភិបាលនិងព្យាយាមផ្ដល់ឱកាសការប្រឹក្សាយោបល់ចូលរួមជ្រោមជ្រែងធ្វើយ៉ាងណាឲ្យសមាជិកសមាជិការបស់សមាគមមានឱកាសផ្សារភ្ជាប់ទំនាក់ទំនងគ្នានិងជាមួយអតិថិជនបានគ្រប់ទីកន្លែងការលក់ដូរមានឱកាសបានរីកចម្រើន។ជាពិសេសព្យាយាមផ្ដល់នូវឱកាសការទាក់ទាញវិនិយោគពីក្រៅប្រទេសមកកម្ពុជាព្រោះការវិនិយោគច្រើនមកកម្ពុជាដែលជាផ្នែកមួយជំរុញឲ្យវិស័យអចលនទ្រព្យមានការរីកចម្រើននៅពេលអចលនទ្រព្យមានការរីកចម្រើនសេដ្ឋកិច្ចកម្ពុជាក៏រីកចម្រើន។
លោកបានមានប្រសាសន៍ទៀតថា«វិស័យដីឡូតិ៍នឹងមានភាពរីកចម្រើននិងមានការទទួលស្គាល់បើយើងមានភាពស្របច្បាប់អនុលោមតាមច្បាប់អនុញ្ញាតដូចជាការបង់ពន្ធតែបើសិនមានអ្នកអភិវឌ្ឍន៍ចង់គេចវេ វិស័យនេះនឹងមិនមានការទទួលស្គាល់និងឲ្យតម្លៃនោះទេ»។
ទាកទងនឹងស្ថានភាពគម្រោងដីឡូត៍ លោកឧកញ៉ា បានលើកឡើងថា៖ស្ថានភាពវិបត្តិកូវីដ១៩និងសង្គ្រាមរុស្ស៊ីអ៊ុយក្រែនមានផលប៉ះពាល់ដល់វិស័យអចលនទ្រព្យផងដែរ។កន្លងមកអ្នកអភិវឌ្ឍន៍ដីឡូឬអចលនទ្រព្យជួបបញ្ហាច្រើនដោយសារតែចរន្តនៃការលក់និងអំណាចនៃការទិញធ្លាក់ចុះ។អ្វីដែលលោកមើលឃើញនៅឆ្នាំបន្ទាប់គឺនៅឆ្នាំ២០២៣វិស័យអចលនទ្រព្យអាចនឹងល្អឡើងវិញខ្លះៗ។ក្រោយវិបត្តិកូវីដ និងក្នុងឆ្នាំ២០២៣ ខាងមុខនេះ មានព្រឹត្តិការណ៍សំខាន់ៗដូចជាការប្រកួតកីឡាស៊ីហ្គេមដែលនឹងទាក់ទាញភ្ញៀវទេសចរគ្រប់បណ្តាប្រទេសមកកម្ពុជាបន្ថែមលើនេះក៏មានការព្យាករណ៍ថាវិស័យសំណង់រំពឹងងើបវិញក្នុងអត្រា៧.២%ខណៈវិស័អចលនទ្រព្យអាចងើបឡើងក្នុងកម្រិត ៥.២%។នេះបើយោងតាមសារាចរណ៍ណែនាំស្តីពីការរៀបចំសេចក្តីព្រៀងច្បាប់សម្រាប់ប្រើប្រាស់ឆ្នាំ២០២៣ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ពាក់ព័ន្ធនឹងបញ្ហាប្រឈម លោកឧកញ៉ា ម៉ន សុខា បានបន្តលើកឡើងថា៖អ្នកអភិវឌ្ឍន៍ដីឡូប្រឈមនឹងបញ្ហាផ្លូវច្បាប់ច្រើនព្រោះរាជរដ្ឋាភិបាលនិងស្ថាប័នជំនាញពាក់ព័ន្ធបានចេញច្បាប់ថ្មីៗជាច្រើនដែលអ្នកអភិវឌ្ឍន៍ដីឡូត៍ តាមមិនទាន់និងពុំយល់ដឹងអំពីគោលការណ៍ទាំងនោះហាក់ដូចជាថ្មីពេកសម្រាប់ពួកគាត់។លោកបានសំណូមពរដល់រាជរដ្ឋាភិបាក្រសួងពាក់ព័ន្ធ ជួយជំរុញនិងផ្សព្វផ្សាយពីគោលនយោបាយច្បាប់បញ្ញត្តិទៅដល់អ្នកអភិវឌ្ឍន៍និងស្នើសុំបន្ទូរបន្ថយលើពន្ធដើម្បីជៀសវាងអ្នកអភិវឌ្ឍន៍ក្លាយទៅជាជនរងគ្រោះដោយសារច្បាប់។
លោកឧកញ៉ា ឃាង ពុទ្ធី ដែលត្រូវបានជ្រើសរើសជាទីប្រឹក្សាសមាគមអ្នកអភិវឌ្ឍន៍ដីឡូកម្ពុជានៅអាណត្តិទី២ទៀត បានប្រាប់CFN ថា៖លោកបានមើលឃើញនិងយល់ឃើញថាអាជីវកម្មដីឡូត៍នៅកម្ពុជាជាអាជីវកម្មមួយល្អពាក់ព័ន្ធទៅនឹងអ្នកដែលមានជីវភាពទាបទៅមធ្យមធ្វើឲ្យពួកគាត់មានការវិនិយោគអាចរកប្រាក់ចំណេញអាចចេះសន្សំប្រាក់និងមានឱកាសមានលំនៅឋានផ្ទាល់ខ្លួនតាមរយៈការទិញដីឡូត៍ទុកសិនក្រោយមកពេលពួកគាត់មានលុយពួកគាត់នឹងអាចសាងសង់ផ្ទះបាន។អ្នកខ្លះអត់មានលទ្ធភាពទិញផ្ទះតែម្ដងនោះទេ។
លោកបានលើកឡើងទៀតថា៖មានបញ្ហាអសកម្មមួយចំនួននាពេលកន្លងមក អ្នកអភិវឌ្ឍន៍ដីឡូត៍ខ្លះមិនបានអភិវឌ្ឍតាមអ្វីដែលបានគ្រោងទុកក្នុងផែនការមេនិងគម្រោងរបស់ពួកគាត់ដែលបានសន្យាជាហេតុធ្វើឲ្យមានពាក្យចចាមអារាមមិនល្អដែលធ្វើឲ្យគម្រោងមួយចំនួនត្រូវជាប់គាំង។បញ្ហាទាំងអស់នេះទាមទារឲ្យរាជរដ្ឋាភិបាល និយ័តករ អាជីវកម្មអចលនទ្រព្យ ក្រសួងរៀបចំដែនដីនគរូបនីយកម្ម រដ្ឋាករទឹក អគ្គិសនីកម្ពុជានិងភាគីពាក់ព័ន្ធផ្សេងទៀតដូចជាអ្នកអភិវឌ្ឍន៍ដីឡូនិងអតិថិជន ត្រូវតែចូលរួមធ្វើការទាំងអស់គ្នា។
លោកឧកញ៉ា បានសម្ដែងនូវការគាំទ្រចំពោះសមាគមអ្នកអភិវឌ្ឍដីឡូត៍កម្ពុជាព្រោះមានបញ្ហាពាក់ព័ន្ធដល់ប្រជាជនប្រមាណពី ៤០ ទៅ ៧០ម៉ឺននាក់ដែលបានទិញដីឡូត៍។ពួកគេជួបប្រទះបញ្ហាជាច្រើនដែលត្រូវស្វែងរកដំណោះស្រាយ។ជាពិសេសខាងរដ្ឋាករទឹកនិងអគ្គិសនីកម្ពុជាអាចសហការជាមួយគ្នានិងអ្នកអភិវឌ្ឍន៍ដីឡូកម្ពុជាក្នុងគោលបំណងអភិវឌ្ឍប្រព័ន្ធទឹកប្រព័ន្ធភ្លើងនិងហេដ្ឋារចនាសម្ព័ន្ធ។
លោកបានលើកឡើងថាបើយើងអត់មានសមាគមអ្នកអភិវឌ្ឍន៍ដីឡូត៍កម្ពុជាដែលជាបណ្ដុំអ្នកវិនិយោគអចលនទ្រព្យទេនោះ ក្រសួង ឬអាជ្ញាធរពាក់ព័ន្ធក៏ពិបាកនឹងធ្វើការជាមួយអ្នកអភិវឌ្ឍន៍នីមួយៗដែលមានចំនួនដល់រាប់ពាន់។លោកគាំទ្រឲ្យមានដំណោះស្រាយរួមដើម្បីអាចឲ្យប្រជាជនដែលបានទិញដីឡូត៍ឬក៏វិនិយោគឆ្លើយតបតាមសេចក្តីត្រូវការហើយនៅពេលអនាគតពួកគាត់នឹងមានលំនៅឋានសមរម្យទាំងអស់គ្នាស្របទៅតាមគោលនយោបាយរបស់រាជរដ្ឋាភិបាលនិងគណបក្សប្រជាជនកម្ពុជាដែលតែងតែគិតគូរដល់ប្រជាជនគ្រប់ពេលវេលា។
លោករំពឹងថាអ្នកអភិវឌ្ឍន៍ដីឡូត៍នឹងពង្រឹងសមត្ថភាព អភិវឌ្ឍគម្រោងនីមួយៗឲ្យមានលក្ខណៈស្តង់ដារ ជាពិសេសការចេញបណ្ណកម្មសិទ្ធិនិងកុំនិយាយភូតកុហកដល់អតិថិជន។
លោក ម៉ាន់ ច័ន្ទឌី ទីប្រឹក្សាសមាគមអ្នកអភិវឌ្ឍន៍ដីឡូកម្ពុជា បានមានប្រសាសន៍ថា៖សមាគមអ្នកអភិវឌ្ឍន៍ដីឡូកម្ពុជាជាបណ្ដុំនៃអ្នកអភិវឌ្ឍន៍ដីឡូតិ៍ដែជួយជាច្រើនដល់ប្រជាពលរដ្ឋ។ការចងក្រងជាសមាគមនេះសំខាន់ដែលអាចមានសំឡេងនិយាយជាមួយរាជរដ្ឋាភិបាល បណ្ដាស្ថាប័នផ្សេងៗជាពិសេសអគ្គិសននិងរដ្ឋាករទឹកដើម្បីជួយសម្រួលការងារវិស័យអភិវឌ្ឍន៍ដីឡូកម្ពុជាដូចជាការតបណ្ដាញទឹក ភ្ជាប់ផ្លូវទៅកន្លែងអភិវឌ្ឍន៍ជាដើម។ការអភិវឌ្ឍផ្លូវថ្នល់ប្រព័ន្ធលូនិងហេដ្ឋារចនាសម្ព័ន្ធក៏ជួយដល់វិស័យសេដ្ឋកិច្ចជាតិផងដែរ។សមាគមជួយផ្ដល់ឱកាសឲ្យប្រជាជនមានចំណូលដែលមានចំណូលទាបនិងមធ្យមមានឱកាសទិញដីឡូដើម្បីសាងសង់លំនៅឋាន។
លោក រស់ សុវណ្ណថា សមាជិកក្រុមប្រឹក្សាភិបាល បានឱ្យដឹងថាគោលបំណងរបស់សមាគមអ្នកអភិវឌ្ឍន៍ដីឡូកម្ពុជា គឺរួមចំណែកជាមួយរដ្ឋាភិបាលកម្ពុជានិងអ្នកដែលពាក់ព័ន្ធនានាដើម្បីពង្រឹង និងលើកកម្ពស់ក្រមសីលធម៌វិជ្ជាជីវៈ សុចរិតភាព គណនេយ្យភាព លើការពង្រីកតម្រូវការទីផ្សារដីឡូត៍របស់ខ្លួនប្រកបដោយសុខដុមនីយកម្មស្របតាមច្បាប់ជាធរមាននិងមានទស្សនវិស័យចង់ឃើញការអភិវឌ្ឍគម្រោងអចលនវត្ថុដីឡូត៍នៅកម្ពុជាមានស្តង់ដារ និងតម្លាភាព រវាងក្រុមហ៊ុនអភិវឌ្ឍន៍ និងនិយ័តករអាជីវកម្មអចលនវត្ថុ និងបញ្ហាំ និងសារពើពន្ធដារកម្ពុជា ជាផលប្រយោជន៍ដល់ប្រជាពលរដ្ឋអ្នកប្រើប្រាស់ និងភាគីពាក់ព័ន្ធទាំងអស់បានចំនេញ ជួយប្រទេសកម្ពុជាក្លាយជាប្រទេសអ្នកមានបានឆាប់រហ័ស។
លោកបានបន្តថា៖បេសកកម្មរបស់សមាគម៖១.សមាគមមានបេសកកម្មបម្រើសមាជិកទាំងអស់ដោយជួយឲ្យពួកគាត់ទទួលបាននូវឱកាសនិងអត្ថប្រយោជន៍ប្រកួតប្រជែងទីផ្សារអចលនទ្រព្យដីឡូត៍តាមរយៈការសហការ និងយោគយល់គ្នាទៅវិញទៅមកឲ្យបានជិតស្និតក្នុងចំណោមអ្នកអភិវឌ្ឍដីឡូត៍និងភ្នាក់ងារលក់ដីឡូត៍។២. ជំរុញលើកទឹកចិត្តដល់ម្ចាស់គម្រោងអភិវឌ្ឍន៍ដីឡូត៍ និងភ្នាក់ងារលក់ឲ្យចូលរួមអនុវត្តន៍ស្របតាមច្បាប់។៣. ចូលរួមសហការ ចែករំលែកបទពិសោធន៍ តាមរយៈវេទិកា សិក្ខាសាលានិងវគ្គបណ្តុះបណ្តាលខ្លីៗដើម្បីពង្រឹងសមត្តភាពនិងវិជ្ជាជីវៈរបស់របស់ភ្នាក់ងារលក់ដីឡូត៍ដែលពាក់ព័ន្ធនិងការអភិវឌ្ឍនគម្រោងដីឡូត៍ ឫសេវាកម្មអចលនវត្ថុ។៤. ជំរុញការផ្លាស់ប្តូរនិងចែករំលែកព័ត៌មានពីគ្នាទៅវិញទៅមកដែលពាក់ព័ន្ធជាមួយនិងបញ្ហាដីធ្លី។៥. ជួយសម្របសម្រួលសកម្មភាពសហការអភិវឌ្ឍន៍គម្រោងដីឡូត៍ជាមួយដៃគូក្នុងស្រុក និងបរទេស និងទី៦. ធ្វើកិច្ចសហការជាមួយអ្នកពាក់ព័ន្ធនានាដើម្បីចូលរួមរៀបចំសន្និសីទ កិច្ចប្រជុំ សិក្ខាសាលា ការរៀបចំតាំងពិព័រណ៍នានា និងកិច្ចប្រជុំផ្សេងៗក្នុងកម្រិតជាតិនិងអន្តរជាតិ។
សូមជម្រាបថា៖ សមាជិកក្រុមប្រឹក្សាភិបាលសមាគមអ្នកអភិវឌ្ឍដីឡូត៍កម្ពុជាដែលទើបជាប់ក្នុងអាណត្តិថ្មីអាណត្តិទី២នេះ រួមមាន៖ លោកបណ្ឌិត ខាត់ បូរ៉ា ,លោក ពៅ លីដា, លោក រស់ សុវណ្ណថា, ឧកញ៉ា ផន វណ្ណិត,បណ្ឌិត ទូច ណារិន,លោក អ៊ី ពិសិដ្ឋ ឯកឧត្តម អ៊ុំ សារ៉ាវុធ ឧកញ៉ា សឿ សុវណ្ណ និងលោក ប៉ុក សៅលី ៕ដោយៈសិរីមតី