ភ្នំពេញ៖ក្រសួងពាណិជ្ជកម្មកម្ពុជានិងក្រុមធុរកិច្ចមកពីកូរ៉េខាងត្បូង ថ្មីៗនេះបានចុះទស្សនកិច្ចស្វែងយល់អំពីខ្សែចង្វាក់ផលិតកម្មទឹកត្រីនៅសហគ្រាសផលិតទឹកត្រីមួយកន្លែងនៅក្នុងខេត្តកំពត ក្នុងគោលបំណងជំរុញការនាំចេញផលិតផលទឹកត្រីពីកម្ពុជាទៅកាន់ទីផ្សារប្រទេសកូរ៉េខាងត្បូង ខណៈដែលប្រទេសទាំងពីរ មានកិច្ចព្រមព្រៀងពាណិជ្ជកម្មសេរីទ្វេភាគី និងកិច្ចព្រមព្រៀងដៃគូពាណិជ្ជកម្មគ្រប់ជ្រុងជ្រោយតំបន់ RCEP ជាដើម ដែលផ្ដល់ឱកាសកាន់តែទូលាយសម្រាប់ការធ្វើពាណិជ្ជកម្ម និងវិនិយោគ។
ឯកឧត្តមប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្មនិងគណៈប្រតិភូសមាគមអ្នកនាំចូលកូរ៉េ រួមមាន លោក Jang Gyu-Hwa អនុប្រធានសមាគមអ្នកនាំចូលកូរ៉េ (KOIMA), លោកស្រី Lin Yu ប្រធានក្រុមហ៊ុន GADOSH កាលពីថ្ងៃទី៣ខែធ្នូ បានចុះទស្សនកិច្ចស្វែងយល់អំពីខ្សែចង្វាក់ផលិតកម្មទឹកត្រីនៅសហគ្រាសផលិតទឹកត្រីង៉ូវហេង និងដំណើរការផ្សារអ៊ីឆែង៉ូវហេង នៅទីក្រុងកំពត ខេត្តកំពតក្នុងគោលបំណងជំរុញការនាំចេញផលិតផលទឹកត្រីកម្ពុជាទៅកាន់សាធារណរដ្ឋកូរ៉េ។
ឯកឧត្តម ប៉ាន សូរស័ក្ដិ បានលើកទឹកចិត្តដល់គណៈប្រតិភូកូរ៉េ ឱ្យប្រើប្រាស់នូវកិច្ចព្រមព្រៀងពាណិជ្ជកម្មនានាដែលកម្ពុជាជាសមាជិក រួមមាន៖ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងកិច្ចព្រមព្រៀងពាណិជ្ជកម្មសេរីអាស៊ាន-កូរ៉េ ជាពិសេសកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ (CKFTA) ដែលទើបតែចូលជាធរមាននាថ្ងៃទី១ ខែធ្នូ ឆ្នាំ២០២២នេះ ដើម្បីជំរុញឱ្យការធ្វើពាណិជ្ជកម្មរវាងប្រទេសទាំងពីរ កាន់តែកើនឡើងបន្ថែមទៀត។
លើសពីនេះ ឯកឧត្តមរដ្ឋមន្ត្រី បានផ្ដល់អនុសាសន៍ណែនាំដល់ក្រុមហ៊ុនទឹកត្រីង៉ូវហេង សិក្សាស្វែងយល់ និងទាញយកបច្ចេកទេស បទពិសោធន៍ថ្មីៗបន្ថែមទៀត ពីខាងភាគីកូរ៉េ ដើម្បីបង្កើនគុណភាព ផលិតភាព និងស្ដង់ដារផលិតផលរបស់ខ្លួនទៅកាន់ទីផ្សារអន្តរជាតិ ផងដែរ។
ជាមួយគ្នានេះ លោក Jang Gyu-Hwa អនុប្រធានសមាគមអ្នកនាំចូលកូរ៉េ បានបង្ហាញពីគោលបំណងរបស់គណៈប្រតិភូសមាគមអ្នកនាំចូលកូរ៉េ ក្នុងការនាំយកនូវផលិតផលទឹកត្រី ង៉ូវហេង ខេត្តកំពតចូលទៅកាន់ទីផ្សារប្រទេសកូរ៉េ ដើម្បីប្រើប្រាស់ប្រចាំថ្ងៃ និងធ្វើជាវត្ថុធាតុដើមក្នុងការផលិតគីមឈី ផងដែរ។ លោកបន្តថាសមាគមននេះ នឹងខិតខំប្រឹងប្រែងឱ្យអស់លទ្ធភាពដើម្បីជំរុញកិច្ចការនេះឱ្យបានឆាប់បំផុត៕ដោយៈសិរីមតី
