កីឡាករ Olivier Giroud គឺជាផ្នែកមួយដ៏សំខាន់នៃក្រុមជម្រើសជាតិបារាំង ដែលឈ្នះពានរង្វាន់ ក្នុងព្រឹត្តិការណ៍ World Cup 2018 ប៉ុន្តែនៅប្រទេសកាតានេះ ខ្សែប្រយុទ្ធរូបនេះ បាននាំឱ្យមានគ្រាប់បាល់ ដែលបាត់ពីការប្រកួតរបស់គេ កាលពី ៤ឆ្នាំមុន នៅប្រទេសរុស្ស៊ីនោះ។
នៅយប់ដែលខ្សែប្រយុទ្ធ Kylian Mbappe ស៊ុតបញ្ចូលទីបាន ២គ្រាប់យ៉ាងអស្ចារ្យ កីឡាករ Giroud បានកត់ត្រាខ្លួនឯងទៅក្នុងសៀវភៅប្រវត្តិសាស្ត្រជាមួយនឹងគ្រាប់បាល់ទី៥២ របស់ខ្លួន សម្រាប់ក្រុមមាន់គក ដែលជាការបំបែកកំណត់ត្រារបស់អតីតកីឡាករ លោក Thierry Henry។
ក្នុងការប្រកួតវគ្គ ១៦ក្រុមចុងក្រោយ ដែលកីឡាករ Mbappe ត្រូវប្រឈមជាមួយខ្សែប្រយុទ្ធ Robert Lewandowski របស់ក្រុមប៉ូឡូញនោះ វាគឺកីឡាករ Giroud ដែលមានវ័យច្រើនដល់ទៅ ៣៦ឆ្នាំឯណេះទេ បានជួយឱ្យក្រុមបារាំងស្ថិតនៅលើផ្លូវនៃការទទួលបានជ័យជម្នះ ៣-១ ជាមួយនឹងគ្រាប់បាល់បើកឆាក នៅ ១នាទី មុនឈប់សម្រាកវគ្គទី១។
គ្រូបង្វឹកក្រុមជម្រើសជាតិបារាំង លោក Didier Deschamps បាននិយាយថា៖ «Olivier (Giroud) តែងតែជាកីឡាករដ៏សំខាន់ម្នាក់។ បើទោះបីជា ៤ឆ្នាំមុន ជាមួយនឹងការឈ្នះពានរង្វាន់ ដែលរូបគេមិនបានស៊ុតបញ្ចូលទីក៏ដោយ ក៏រូបគេនៅតែសំខាន់ សម្រាប់ក្រុមជានិច្ច»។
ក្រុមបារាំងត្រូវតែមានភាពអត់ធ្មត់ ចំពោះក្រុមប៉ូឡូញ ដែលតាមការរំពឹងទុក ត្រូវតែលេងការពារយ៉ាងរឹងមាំ ប៉ុន្តែនៅពេលដែលបាល់ដ៏វិសេសពីកីឡាករ Mbappe បញ្ជូនទម្លុះឱ្យទៅកីឡាករ Giroud ដែលទទួលបាល់ ហើយស៊ុតផុតដៃអ្នកចាំទី Wojciech Szczensy ចូលទីយ៉ាងស្អាត បានធ្វើឱ្យហ្គេមចាប់ផ្ដើមប្រែប្រួល។
ចូលដល់វគ្គទី ២ ក្រុមបារាំងមានប្រៀបកាន់តែខ្លាំង ហើយបន្ថែមការនាំមុខបន្ថែម ២គ្រាប់ទៀត ដែលទម្លុះសំណាញ់ទីដោយកីឡាករ Mbappe មុនពេលកីឡាករ Lewandowski ស៊ុតបាល់ប៉េណាល់ទីបានសម្រេច ១គ្រាប់ឱ្យក្រុមប៉ូឡូញ នៅនាទីចុងក្រោយនៃការប្រកួត។ ក្រុមបារាំងត្រូវឡើងទៅជួបក្រុមតោកំណាចអង់គ្លេស នៅវគ្គ ៨ក្រុមចុងក្រោយ៕
