ទីបំផុត អ៊ុយក្រែនបានបញ្ជាក់ថា បានទទួលប្រព័ន្ធការពារដែនអាកាស HAWK ដំបូងបង្អស់ពីប្រទេសអេស្ប៉ាញ ដែលជាជំនួយប្តេជ្ញាចិត្តរបស់សម្ព័ន្ធមិត្តសម្រាប់ការបង្រ្កាប រុស្ស៊ី។
រដ្ឋមន្ត្រីក្រសួងការពារជាតិអ៊ុយក្រែន លោក Oleksii Reznikov បាននិយាយបន្ទាប់ពីកិច្ចប្រជុំជាមួយសមភាគីអេស្ប៉ាញនៅទីក្រុង Odesa នៅថ្ងៃសៅរ៍ថា ប្រទេសអ៊ុយក្រែនបានទទួលប្រព័ន្ធការពារដែនអាកាស HAWK ជាលើកដំបូងរបស់ខ្លួនពីប្រទេសអេស្ប៉ាញតាមការសន្យាកាលពីដើមខែមុន។
ជាមួយគ្នានេះ ឧបករណ៍នៃប្រព័ន្ធការពារ HAWK បន្ថែមទៀតនឹងត្រូវដឹកចេញជាបន្តបន្ទាប់ពីឃ្លាំងរបស់អេស្ប៉ាញ ខណៈទាហានអ៊ុយក្រែនក៏បានទទួលការបណ្តុះបណ្តាលប្រើប្រព័ន្ធនេះរួចរាល់ដែរហើយនៅក្នុងប្រទេសអេស្ប៉ាញ។ គួរដឹងថា ប្រព័ន្ធការពារដែនអាកាសរយៈចម្ងាយមធ្យមនេះ គឺមានដើមកំណើតដំបូងនៅសហរដ្ឋអាម៉េរិក ខណៈបានចូលបម្រើវិស័យការពារជាតិតាំងពីដើមទសវត្សរ៍ឆ្នាំ ១៩៦០មកម្ល៉េះ ជាមួយការធ្វើទំនើបកម្មម្តងហើយម្តងទៀតរហូតដល់បច្ចុប្បន្ន៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
