ខ្សែប្រយុទ្ធ Thomas Mueller បាននិយាយថា ការធ្លាក់ចេញពីការប្រកួតប្រជែងត្រឹមជុំទី ១ ជាប់ៗគ្នារបស់ក្រុមជម្រើសជាតិអាល្លឺម៉ង់របស់ខ្លួនពីព្រឹត្តិការណ៍ World Cup គឺជា«មហន្តរាយទាំងស្រុង» ខណៈដែលមិត្តរួមក្រុម Kai Havertz ប្រដូចទៅនឹង«ការមើលភាពយន្តបែបភ័យរន្ធត់»។
ក្រុមឥន្ទ្រីដែកអាល្លឺម៉ង់ បានយកឈ្នះក្រុមកូស្តារីកា ៤-២ ប៉ុន្តែក្រុមអេស្ប៉ាញ បានចាញ់ក្រុមជប៉ុន ២-១ សម្រាប់ការប្រកួតចុងក្រោយ កាលពីថ្ងៃព្រហស្បតិ៍ ដែលមានន័យថា ក្រុមអាល្លឺម៉ង់បានបញ្ចប់នៅចំណាត់ថ្នាក់លេខ ៣ ក្នុងពូល E តាមពីក្រោយក្រុមគោជល់អេស្ប៉ាញ ដោយក្រុមទាំង ២ មាន ៤ពិន្ទុស្មើគ្នា ហើយទីតាំងឈរ ត្រូវបានកំណត់ដោយគ្រាប់បាល់បាញ់ចំណេញខុសគ្នា។
កីឡាករ Mueller បាននិយាយថា៖ «វាពិតជារឿងឈឺចាប់ដ៏មិនគួរឱ្យជឿ សម្រាប់ពួកយើង ពីព្រោះលទ្ធផលរបស់យើងនឹងគ្រប់គ្រាន់ហើយ។ វាជាការមានអារម្មណ៍គ្មានកម្លាំងកំហែងសោះ»។
កីឡាករ Mueller គឺជាផ្នែកមួយនៃក្រុម ដែលបានឈ្នះពាន World Cup 2014 នៅប្រទេសប្រេស៊ីល ហើយក៏ស្ថិតក្នុងក្រុម ដែលត្រូវបានជ្រុះចេញ ក្នុងដំណាក់កាលនេះដូចគ្នា កាលពី ៤ឆ្នាំមុន នៅប្រទេសរុស្ស៊ី។
ចំណែកកីឡាករ Havertz បាននិយាយថា ក្រុមអាល្លឺម៉ង់ទើបបានដឹងជោគវាសនារបស់ខ្លួន កាលពីថ្ងៃព្រហស្បតិ៍នោះ នៅពេលលទ្ធផលនៃការប្រកួត រវាងក្រុមជប៉ុន និងអេស្ប៉ាញ ត្រូវបានបង្ហាញនៅលើស្គ្រីនដ៏ធំរបស់កីឡដ្ឋាន ដែលធ្វើឱ្យអារម្មណ៍កាន់តែពិបាកឡើងៗ។
«នៅពេលដែលវាកើតឡើងបែបនេះ វាមានអារម្មណ៍ថា ដូចជាកំពុងមើលភាពយន្តបែបភ័យរន្ធត់ អ៊ីចឹង!»។ នេះជាសម្ដីរបស់កីឡាករ Havertz ដែលស៊ុតបញ្ចូលទីបាន ២គ្រាប់ បន្ទាប់ពីចូលលេង ក្នុងហ្គេមចុងក្រោយនេះ ក្នុងនាមជាកីឡាករបម្រុង។
កីឡាករ Havertz បានបន្ថែមថា៖ «យើងបានដឹង ក្នុងអំឡុងពេលប្រកួត ដែលក្រុមជប៉ុន កំពុងនាំមុខ ហើយបន្ទាប់មកចំណាត់ថ្នាក់របស់ក្រុមប្រចាំពូល ត្រូវបានបង្ហាញ នៅក្នុងកីឡដ្ឋាន។ យើងនៅតែមានសង្ឃឹមតិចតួចថា ក្រុមអេស្ប៉ាញនឹងអាចស៊ុតបញ្ចូលទីបានវិញ។ ប៉ុន្តែបន្ទាប់មក យើងបានដឹងថា ការប្រកួតនោះ បានបញ្ចប់ហើយ»៕