ភ្នំពេញ៖រដ្ឋាភិបាលជប៉ុន បានឯកភាពផ្តល់ជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ គូសាណូណិ ថវិកាសរុបចំនួន ១៧១,៦៤១ ដុល្លារអាមេរិក សម្រាប់ការសាងសង់អគារមេត្តយ្យសិក្សា១ខ្នង ២បន្ទប់ នៅសាលាមត្តេយ្យសិក្សាបណ្តុះកុមារ ក្នុងខេត្តបាត់ដំបង និងការសាងសង់អគារសិក្សា១ខ្នង ៥បន្ទប់នៅអនុវិទ្យាល័យតានី ក្នុងខេត្តកោះកុង។
ថវិកាចំនួន ៧៩,៤៦៥ ដុល្លារអាមេរិក សម្រាប់ “គម្រោងសាងសង់អគារសិក្សានៅសាលាមត្តេយ្យសិក្សាបណ្តុះកុមារក្នុងក្រុងបាត់ដំបង ខេត្តបាត់ដំបងនិងថវិកាចំនួន ៩២,១៧៦ ដុល្លារអាមេរិក សម្រាប់ “គម្រោងសាងសង់អគារសិក្សានៅអនុវិទ្យាល័យតានីក្នុង ស្រុកស្រែអំបិល ខេត្តកោះកុង។
លោក តានិណៃ អ៊ិឈិតុម៉ុ ឧបទូតនៃស្ថានទូតជប៉ុនប្រចាំព្រះរាជាណាចក្រកម្ពុជា និងអ្នកតំណាងមកពីស្ថាប័នទាំងពីរបានចុះហត្ថលេខាលើកិច្ចសន្យាផ្តល់ជំនួយឥតសំណងនេះនៅស្ថានទូតជប៉ុនប្រចាំកម្ពុជានៅថ្ងៃទី០១ ខែធ្នូ។
លោក តានិណៃ អ៊ិឈិតុម៉ុ ឧបទូតនៃស្ថានទូតជប៉ុនប្រចាំព្រះរាជាណាចក្រកម្ពុជា សង្ឃឹមថា ជំនួយឥតសំណងនេះនឹងលើកកម្ពស់គុណភាពជីវិតរបសប្រជាជនដែលរស់នៅក្នុងទីតាំងគម្រោងនីមួយៗ៕ដោយៈផាវី