ខ្សែប្រយុទ្ធឆ្នើម Cristiano Ronaldo មិនបានចូលរួមហ្វឹកហាត់ជាមួយមិត្តរួមក្រុមព័រទុយហ្គាល់របស់ខ្លួននោះទេ កាលពីថ្ងៃពុធ មុនការប្រកួតតាមពូលចុងក្រោយ ក្នុងព្រឹត្តិការណ៍ World Cup របស់ពួកគេ ទល់នឹងក្រុមកូរ៉េខាងត្បូង។
យោងតាមប្រភពពីសហព័ន្ធបាល់ទាត់ប្រទេសព័រទុយហ្គាល់ ខ្សែប្រយុទ្ធវ័យ ៣៧ឆ្នាំ កំពុងធ្វើលំហាត់ប្រាណឱ្យរាងកាយប្រសើរឡើងវិញជាពិសេស។ កីឡាករ Ronaldo ដែលមិនទាន់មានក្លិបនៅឡើយ ចាប់តាំងពីចែកផ្លូវជាមួយក្លិប Manchester United អំឡុងព្រឹត្តិការណ៍នេះនោះ បានស៊ុតបាល់ប៉េណាល់ទីសម្រេច ១គ្រាប់ដែរ ក្នុងជ័យជម្នះ នៅហ្គេមបើកឆាករបស់ក្រុមព័រទុយហ្គាល់លើក្រុមហ្គាណា។
ក្រុមជម្រើសជាតិព័រទុយហ្គាល់ បានយកឈ្នះក្រុមអ៊ុយរូហ្គាយ ២-០ ក្នុងការប្រកួតទី២ របស់ពួកគេ ដើម្បីធានាសិទ្ធិឡើងទៅវគ្គ ១៦ក្រុមចុងក្រោយ ដោយ Ronaldo ហាក់ដូចជារកបាន ១គ្រាប់ដែរ ប៉ុន្តែរូបគេមិនបានប៉ះបាល់នោះទេ ហើយគ្រាប់បាល់នោះត្រូវបានផ្ដល់ឱ្យមិត្តរួមក្រុម Bruno Fernandes។
ការដណ្ដើមបានពិន្ទុ ពេលប៉ះក្រុមកូរ៉េខាងត្បូង នៅថ្ងៃសុក្រនឹងគ្រប់គ្រាន់ ក្នុងការធានាឱ្យពួកគេឈរទីកំពូល ខណៈដែលពួកគេក៏អាចចាញ់ ហើយនៅតែឈរទី១ ប្រសិនបើក្រុមហ្គាណា របូតពិន្ទុ ឬក៏មានជ័យជម្នះ ប៉ុន្តែមិនមានការចាញ់រហូតដល់ទៅ ៣គ្រាប់នោះទេ។
ប្រសិនបើកីឡាករ Ronaldo មិនមានវត្តមានពេលប្រកួតជាមួយក្រុមកូរ៉េខាងត្បូងទេនោះ ខ្សែប្រយុទ្ធ Goncalo Ramos របស់ក្រុម Benfica និង Andre Silva របស់ក្រុម RB Leipzig ឬកីឡាករ Rafael Leao របស់ក្រុម AC Milan នឹងស្ថិតក្នុងចំណោមកីឡាករជម្រើសដំបូង ក្នុងហ្គេមនោះ៕