លោកស្រី Stephanie Frappart នឹងក្លាយជាស្ត្រីដំបូងគេ ដែលធ្វើជាអាជ្ញាកណ្តាល សម្រាប់ការប្រកួតបាល់ទាត់ផ្នែកបុរស ក្នុងព្រឹត្តិការណ៍ World Cup នៅពេលដែលគាត់ត្រូវទទួលបន្ទុកកាត់ក្ដី ក្នុងហ្គេមនៃវគ្គសន្សំពិន្ទុតាមពូល រវាងក្រុមជម្រើសជាតិអាល្លឺម៉ង់ និងក្រុមកូស្តារីកា ពនៅថ្ងៃព្រហស្បតិ៍នេះ។
គាត់ត្រូវបានដាក់ឱ្យបំពេញតួនាទីជាមន្ត្រីទី៤ រហូតមកដល់ពេលនេះ ក្នុងការប្រកួតប្រជែង ឆ្នាំ២០២២ ហើយនឹងបង្កើតប្រវត្តិសាស្ត្រ នៅពេលដែលលោកស្រីទទួលភារកិច្ចជាអាជ្ញាកណ្តាលពេញលេញ ក្នុងការប្រកួត ប្រចាំពូល E នៅកីឡដ្ឋាន Al Bayt។
លោកស្រី Frappart នឹងមានជំនួយការ ដោយម្នាក់ជាសញ្ជាតិប្រេស៊ីល Neuza Back និងម្នាក់ទៀតជាសញ្ជាតិម៉ិកស៊ិក Karen Diaz Medina ដើម្បីបង្កើតក្រុមស្ត្រីអាជ្ញាកណ្ដាលទាំងអស់ ក្នុងការប្រកួត នៅ World Cup ផ្នែកបុរសជាលើកដំបូង។ អ្នកនាង Kathryn Nesbitt នឹងធ្វើការជាអ្នកត្រួតពិនិត្យបច្ចេកទេសអកហ្ស៊ឺ ក្នុងចំណោមក្រុម VAR (វីដេអូជំនួយការអាជ្ញាកណ្ដាល)។
លោកស្រី Frappart វ័យ ៣៨ឆ្នាំ ធ្លាប់មានបទពិសោធន៍ធ្វើតួនាទី នៅក្របខ័ណ្ឌ Champions League និងវគ្គជម្រុះ World Cup របស់ទ្វីបអឺរ៉ុប ខណៈពេលដែលគាត់ ក៏ធ្លាប់បានដឹកនាំការប្រកួត ក្នុងវគ្គផ្តាច់ព្រ័ត្រនៃកម្មវិធី Coupe de France 2022 របស់ប្រទេសបារាំង និងជុំចុងក្រោយ នៅ World Cup ផ្នែកនារី ឆ្នាំ២០១៩ ផងដែរ៕