ប្រធានាធិបតីរុស្ស៊ី លោកវ្ល៉ាឌឹមៀរពូទីន បាននិយាយថា ភាពក្រីក្រនៅក្នុងប្រទេសរបស់លោកបច្ចុប្បន្នបានធ្លាក់ចុះជាង ១០% នៅចុងត្រីមាសទី៣នេះ បើទោះបីជាមានសង្រ្គាមក៏ដោយ។
នេះដោយយោងតាមសម្រង់សំដីលោកពូទីនដោយសារព័ត៌មានរដ្ឋ TASS ក្នុងអំឡុងកិច្ចប្រជុំជាមួយសមាជិករដ្ឋាភិបាលកាលពីថ្ងៃពុធទី ៣០ ខែវិច្ឆិកា។ លោកពូទីនបានជម្រាបប្រាប់ទៅកាន់មន្រ្តីក្រោមឱវាទយ៉ាងដូច្នេះថា “កម្រិតនៃភាពក្រីក្រប្រទេសរបស់យើងបានធ្លាក់ចុះដល់ទៅ១០.៥% នៅចុងត្រីមាសទីបីនេះ”។ “ទោះបីជាវាគឺជាការថយចុះតិចតួចបើប្រៀបធៀបនឹងត្រីមាសឆ្នាំមុន១១% ក៏ដោយ ប៉ុន្តែវាគឺជាសក្តានុពលដ៏សំខាន់វិជ្ជមានមួយ ក្នុងពេលដែលស្ថានភាពសេដ្ឋកិច្ចប្រទេសកំពុងមានការលំបាក នាពេលបច្ចុប្បន្ន”។
ក្រៅពីកម្រិតនៃភាពក្រីក្របានថយចុះ ក្នុងនោះកំណើនបន្ទាប់បន្សំនៃប្រាក់ចំណូលប្រជាជនក៏បានកើនឡើង១២.៨% ផងដែរក្នុងរយៈពេលប្រាំបួនខែដំបូងនៃឆ្នាំនេះ៕
ប្រភព៖ TASS
ប្រភពរូប៖TASS
ប្រែសម្រួល៖សុខ តុលា
