ភ្នំពេញ៖រថយន្តទំនើបម៉ាកToyota Prius និងម៉ាកToyota Scion xa បានបុកគ្នាពេញទំហឹង បណ្ដាលឱ្យខ្ទេចខ្ទីផ្នែកមុខទាំងសងខាង តែមិនប៉ះពាល់ដល់ជីវិតមនុស្សទេ។ហេតុការណ៍នេះបានកើតឡើងនៅម្តុំស្តុប២៤ម៉ោង តាមផ្លូវសម្តេចជាស៊ីម ក្នុងសង្កាត់ភ្នំពេញថ្មី ខណ្ឌសែនសុខកាលពីរំលងអធ្រាត្រឈានចូលថ្ងៃទី៣០ ខែវិច្ឆិកា។
សាក្សីបានឱ្យដឹងថា មុនកើតហេតុរថយន្តម៉ាកToyota Prius ផ្លាកលេខភ្នំពេញ 2AZ-6983 បើកតាមផ្លូវសម្តេច ជា ស៊ីមពីលិចទៅកើតយ៉ាងលឿន។មកដល់កន្លែងខាងលើក៏បុកគ្នាជាមួយរថយន្តម៉ាកToyota Scion xa ផ្លាកលេខភ្នំពេញ2BO-5672 បើកតាមផ្លូវភ្នំពេញ-ហាណូយ ពីត្បូងទៅជើងលឿនដូចគ្នា បណ្ដាលឱ្យរថយន្តScion រេចង្កូតទៅបុករបងផ្ទះគេខូចខាតផ្នែកមុខយ៉ាងដំណំ។
ក្រោយកើតហេតុ អ្នកបើកបរបានដើរចេញបាត់អស់ទុករថយន្តចោលនៅទីនោះ សមត្ថកិច្ចជំនាញបានស្ទូចយកទៅរក្សាទុកនៅការិយាល័យចរាចរណ៍រាជធានីភ្នំពេញ៕ដោយ៖វិចិត្រ
