មន្រ្តីយោធាអាម៉េរិកជាន់ខ្ពស់មួយរូប បានរាយការណ៍ប្រាប់ថា ទាហានរុស្ស៊ីនិងអ៊ុយក្រែនកំពុងប្រយុទ្ធគ្នាខ្លាំងណាស់នៅខេត្តដូណេតភាគខាងកើត ខណៈខាងអ៊ុយក្រែនបានត្រឹមតែទប់ទល់ប៉ុណ្ណោះ។
យោងតាមបណ្តាញអាល់ចាហ្សេរ៉ា មន្ត្រីយោធាជាន់ខ្ពស់អាម៉េរិកម្នាក់ក្នុងលក្ខខណ្ឌមិនបញ្ចេញឈ្មោះ បានរាយការណ៍ប្រាប់កាលពីថ្ងៃអង្គារថា តំបន់សមរភូមិខ្លាំងជាងគេពេលនេះរវាងរុស្ស៊ីនិងអ៊ុយក្រែន គឺស្ថិតក្នុងខេត្តដូណេត លាតសន្ធឹងពីលើខេត្តលូហាន់ភាគខាងកើតប្រទេសអ៊ុយក្រែន។ កន្លែងផ្ទុះការបាញ់ដែលទាហានអ៊ុយក្រែនពិបាកវាយទម្លុះខ្សែការពាររុស្ស៊ីគឺស្ថិតនៅលើផ្លូវហាយវេ P66 ឆ្ពោះទៅកាន់ភាគខាងត្បូងខេត្ត Severodonetsk។ កងកម្លាំងអ៊ុយក្រែនមិនមានការជឿនលឿនណាមួយនោះទេ បានត្រឹមតែទប់ទល់រុស្ស៊ី មានន័យថា អ៊ុយក្រែនមិនអាចវាយទម្លុះខ្សែប្រយុទ្ធរុស្ស៊ីរំដោះបានទីតាំងឈរជើងថ្មីរបស់ខ្លួនមកវិញទេ។
យ៉ាងណាក៏ដោយ ជុំវិញដំណឹងនេះ មន្រ្តីខាងលើមិនមែនចង់មានន័យថាអ៊ុយក្រែនកំពុងចាញ់ប្រៀបរុស្ស៊ីនោះទេ។ មិនមានការអះអាងឆ្លើយតបពីរុស្ស៊ីឡើយចំពោះព័ត៌មាននេះ។ របាយការណ៍ក្រសួងការពារជាតិរុស្ស៊ីប្រចាំថ្ងៃ បានរាយការណ៍ជាហូរហែថាបានសម្លាប់ទាហានអ៊ុយក្រែន និងកម្ទេចគ្រឿងចក្រជាច្រើនគ្រឿង៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
